НЕВЕСТАЛӦН БӦРДӦМ

Ыджыд горӧн локтісны да керка шӧрӧдз пырисны,
Кыз унмысь пальӧдісны да кок улӧдз лолӧс уськӧдісны,
Озырлунӧн посйысисны да дона куясӧн ошйысисны.
Мыйла нӧ, батьӧ, бласлӧвитін да код сайӧ нӧ нывтӧ сетін?
Сьӧлӧмӧй чукрасьӧ-нюкрасьӧ да поткӧдӧ морӧсӧс.
Шудаысь лои шудтӧмӧн дай кыдзи нӧ мунны-овнысӧ?
Зарни сынанӧн меным ӧні шыльӧдны юрсиӧс да,
Вильыд джодж кузя быть коньӧрлы меным ветлыны дай,
Бархата вольпасьын мустӧм верӧскӧд войяс коллявны дай.
Мусаджык на тай пу сынанӧй да желльӧсь джоджӧй.
Вӧльнӧй светсӧ некор нин ог аддзыв да,
Сьӧлӧм джынйӧй некор нин оз быдмы дай.
Шӧри-пели сійӧс важӧн юкӧма тай...
Веж туруна видзьясын джынъялӧма да
Пемыд вӧр шӧрын дзебӧма.
Шонді-мамӧй ставсӧ аддзывліс да шонтіс-лелькуйтіс,
Тӧлысь-вокӧй ставсӧ казявліс да шыч ни рач оліс.
Здукӧн жебмисны да лясмунісны тай кокни бордъясӧй.
Мустӧмсьыс на мустӧмкӧд меным рӧднитчыны-вужъясьны,
Нэм чӧж понда кӧритны судьба-ичиньӧс,
Мыйысь менӧ ловъявылысь кырлалӧ?
Ӧти лоас шуда, кыкӧн — шудтӧмӧсь.
Нэм чӧж понда ёрны лӧг петкӧдлысь верӧсӧс,
Ӧти видзӧдласӧн кута сотны ёсь синма инькаӧс,
Ӧти мӧвпӧн кута бырӧдны айкалысь акйӧдлӧм.
Кушӧдз сэсся косьмас менам курыд синваӧй,
Тіпкынысӧ дугдас виртӧм сьӧлӧмӧй.
Карта ӧдзӧсӧд пета да, поконичаӧн дай лыддясны.
Муӧдз копыр бать-мамлы да дона рӧдвужлы.
Оз нин ӧзйы некор юр весьтын шуда кодзулыс.