* * *

Матын. Ылын.
Сьӧлӧмын зэв пыдын
Чужис медся ыджыд
Гусятор.
Олам-вылам
Быдӧн
Ӧтка лыдын.
Аддзысьлам кӧ —
Енмыс тӧдӧ, кор.

Ылын. Матын.
Миян эзысь кодзув.
Пӧся шамыртӧма
Киын ки.
Кывтам-катам
Олӧм юті водзӧ.
Ӧні эмӧсь
Ӧта-мӧдлӧн ми...

Матын. Матын.
Воссьӧ тӧдса ӧдзӧс.
Шоныд сывъяд сыла,
Быттьӧ лым.
Шудӧн мавтӧм.
Вирӧй нӧшта ӧддзӧ,
Тӧв шӧр кадӧ
Шковгӧ-вартӧ гым.

Ылын. Ылын.
Тэкӧд менам лолӧй.
Сэні, кӧні чужис
Гусятор.
Енмӧй, кылан?
Муӧдз копыр, ола!
Выльысь чужны
Некор абу сёр.