КАР

Тӧдтӧм йӧз коткодзувъяс моз ветлӧны-жуӧны,
Кодкӧ локтӧ тэрыб восьласӧн, кодкӧ мӧжгӧмӧн, кодкӧ нюмъялӧ,
Кодкӧ жугыль, кодкӧ зумыштчӧма — ёна мыйкӧ мӧвпалӧ.
Синмад оз дзоргыны — кок уланыс.
Гашкӧ, полӧны, гашкӧ, мудзӧмаӧсь, гашкӧ, чайтӧны,
Ставныслы веськодь, мый налӧн лов вылас керсьӧ.
Эськӧ кыйны кӧть ӧти шуда видзӧдлас да горӧдны воча:
Тайӧ ме! Тэ аддзан?
А найӧ сувтлӧны-джӧмдывлӧны, муртса чуймывлӧны,
Видзӧдлӧны веськыдвыв-шуйгавыв,
Лэптывлӧны синъяссӧ сӧмын гӧрд би ӧзйигӧн.
Куим-кык-ӧтик.
«Позьӧ!» — туй мӧдарас шуис светофорыс.
Ызӧбтісны йӧз да быттьӧ ӧта-мӧдсӧ эз казявны.
Эз кӧсйыны казявны.
Мортыс тэрмасис-котӧртіс, но куим-кык-ӧтик...
И бара гӧрд. А виччысигӧн кадыс сувтӧ, лӧньӧ, кулӧ —
Сэки мортыс думыштчывлӧ.
Мыйла ачым эг вудж мӧдарас?
Ме сійӧс кора:
Сёрмысьӧй, видзӧдлы...
Но нинӧм оз артмы. Ме кевма.
А друг кодкӧ сьӧлӧмнас кылас гуся корӧмӧс?
Кодлыкӧ ме моз жӧ, колӧкӧ, оз тырмы синъясын поздысьӧм шоныдыс?
А друг сійӧ ылысянь аддзас да нюмъёвтас меным,
да ставсӧ гӧгӧрвоас?
И бикиньяс качасны, пыркнитасны карыслысь буссьӧм сынӧдсӧ.
Да синъяс ловзясны.