ЧЕРӦН СӦТӦМАӦСЬ ЮРАС

Неважӧн Выльгорт вӧлӧсьтын, Дав сиктын, ӧти гражданин ордын (шуӧны Тикӧн Васьӧ Илляӧн) вӧлӧм пукалӧны гӧсьтъяс. Сэтчӧ жӧ воӧмаӧсь куим гӧтыра-котыра гражданинъяс: Савӧ Микул, Марин пиян Ардӧ да Ӧльӧ. Пукалысьясыд, буракӧ, найӧс мыйлакӧ абу тшӧтш сибӧдӧмаӧсь. Найӧ лӧгасясны дай петасны; петігад посводзад пондасны шыблавны дозмукъяс: ведраяс, шомӧсъяс. Кӧзяиныд петас посводзад дай вӧтлас найӧс ывла вылӧ. Ывла вылад найӧ бара пондасны карапужитчыны: гымӧдчыны, стенас зоръясӧн, песъясӧн кучкавны. Кӧзяиныд бара петас, кӧсъяс ӧлӧдны карапужитчӧмсьыд. Кор кильчӧ ӧдзӧс саяд тувччас, кодкӧ пыр и косьыштас сылы мыйӧнкӧ юрас, сійӧ сэтчӧ и усьӧ садьтӧгыс. Керкаын казяласны, кӧзяиныд мыйкӧ дыр эз пыр керкаад, петасны да, мортыд куйлӧ кильчӧ вылад, садьтӧм, вирсермунӧма. Пыртасны керкаад да регыдджык лэччӧдасны карӧ больничаӧ. Кывсьӧ, быттьӧнӧсь юрас сӧтӧмаӧсь черӧн, вем петтӧдзыс. Кучкысьсӧ пӧ лючки оз на тӧдны, а буянъяссӧ Савӧ Микултӧ да Марин пиянтӧ мыйыськӧ пӧ арестуйтӧмаӧсь жӧ.

Со кутшӧм лёк мортъяс эмӧсь Выльгортад, лёкджыкӧсь зверъясысь.

Выльгортса.