СУД ЛОЗАННАЫН

Озыръяс оз мыждыны ассьыныс слугаяснысӧ.

Колян тӧлын Лозаннаын (эм сэтшӧм кар Швейцарияын) вӧлі рытыввывса государствояслӧн съезд (шусьӧ вӧлі — «Лозаннская конференция»). Сэтчӧ миян Сӧветса Россиясянь муніс делегат т. Воровскӧй. 9-ӧд лунӧ май тӧлысьын сэні Воровскӧйӧс виисны. Озыръяс (буржуйяс) миян вылӧ пыр пиньнысӧ йирӧны. Налы оз вӧлі лӧсяв т. Воровскӧйлӧн веськыда сёрнитӧмыс, медалісны ӧтик сэтчӧс белӧйӧс (фашистӧс) — Конрадиӧс, сійӧ кыйӧдіс да револьверысь и лыйис — сизим пуля вӧлі лэдзӧма Воровскӧйлы юрас.

Швейцарияса правительство кӧсйысьліс видзны миянлысь делегатъясӧс, а некутшӧм охрана абу вӧлі лӧсьӧдӧма.

Кор Россия юаліс Швейцарияса буржуйяслысь та йылысь, найӧ шуисны: «Ми пӧ нинӧмысь абу мыжаӧсь, ми пӧ эгӧ думыштлӧй вины Воровскӧйнытӧ. Конради пӧ виис, сійӧ пӧ и ӧтвечайтас».

Следствие кор кутісны вӧчны, сэки и воссис ставыс: медалӧма Конрадиӧс ыджыд деньга вылӧ Швейцарияса власьт дорын олысь буржуй — Полунин. Виӧмаӧсь Воровскӧйӧс сэтчӧс правительство сӧгласӧн.

Тайӧ тӧлысьын (недель сайын) Лозаннаын вӧлі суд. Судитісны Конрадиӧс Полунинкӧд т. Воровскӧйӧс виӧмысь.

Буржуйяслӧн суд найӧс нинӧмысь эз мыжды — лэдзис вӧля вылӧ.

Конради суд вылас веськыда шуис: «Ме пӧ вии Воровскӧйӧс да и водзӧ на пӧ кута виавны сэтшӧмъяссӧ!»

Став мыжыс налӧн вӧлі суддяяс син водзын, да эз мыждыны!

Тадзи озыр суд судитӧ ассьыс слугаяссӧ. Дерт, оз мыждыны! Асьныс ӧд медалісны виныыс. Та серти сэсся позьӧ нин тӧдны: т. Воровскӧйӧс виысьясыс — став Швейцарияса озыръяс.

Миян Республикалы ӧні Швейцария быттьӧ абу. Некутшӧм сёрни палачьяскӧд оз ло! Россияса уджалысь йӧз оз вунӧд ни оз прӧстит тайӧ лёксӧ!

Став Республика пасьта ӧні мунӧ та кузя уджалысьяслӧн лӧг петкӧдлӧм. Быдлаын вӧчӧны собранньӧяс (митингъяс), быдлаын кылӧ чорыд гӧлӧс: «Помнитлӧй, буржуяс, коркӧ лоӧ тіянлы сувтны революция суд водзӧ. Миян оз вун тіян лёк вӧчӧмыд, бур уджалысьясӧс виалӧмныд! Смерть буржуйяслы!»

Топыдджыка ӧтувтчӧй, крестьяна рабочӧйяскӧд!