ОКТЯБТэ, Октяб, Октяб, Октяб, Гӧль йӧз костын — Ыджыд лун! Тэнӧ пыдди пуктӧ «раб»... Тэ, Октяб, пыр водзӧ мун, Пемыдінӧ, Гӧль йӧз дінӧ! Вит во сайын вӧлі кад: Рочму вылӧ уси пуд; Сэні вежсис олан лад — Дырӧн воис тэнад шуд, Ёна дырӧн, Уна вирӧн. Тэнад власьтыд ӧні кӧрт, Ёна ыджыд сылӧн вын. Тэнад знамя югыдгӧрд — Озыр йӧзлысь ёрӧ син... Сійӧ — вылын, Рочму вылын. Тэнад зэв нин ыджыд шы: Быд йӧз костын — тӧдантор... Гӧгӧр гызис... Содӧ гы Саридз сайын, пом ни дор... Сэн ас костас Мунӧ косьяс. Озыр йӧзысь тэ эн пов, Найӧ видӧны кӧ — мед! Гӧльяс, «рабъяс» понда ов, Налысь дугдывтӧг пыр тӧд Сьӧкыд олӧм, Ёна полӧм... Тэ, Октяб, мун водзӧ пыр Аслад туйӧд! Сэсь эн кеж! Паськыд му гӧль йӧзӧн тыр, — Ыджыд выннад налысь веж Оланногсӧ, Курыд шогсӧ.
