«ГРЕК»

Миянсянь ылын,
Ылын, лунвылын
Оліс да выліс Паша-турок.
Енмысь эз повлы,
Перна эз новлы,
Кослунын сёйліс выялӧн рок.
Коркӧ-некоркӧ
(Бубаыд торкӧ)
Паша-турокӧс «таляліс» грек:
Сёйны ни юны...
Петны ни мунны...
Кытчӧ он тувччы — быдлаын рӧк.
Тыдалӧ, овсис...
Сӧмын эз повзьы
Вокыс туроклӧн Паша Кемаль.
Грекӧс тай тшапкис...
Му бердӧ крапкис...
Люкӧдіс, чужйис... Вокыд ӧд жаль.
Ёна кӧ дурис — 
Уна и сюрис:
Котӧрӧн нуис медбӧръя лов.
«Талясьысь» грекыд
Муніс тай регыд;
Сымда и колӧ, сӧмын эн пов!
Пӧрысьяс, кывзӧй
Том мортлысь кывсӧ:
Пышйис Кемальысь «талясьысь» грек — 
Позьӧ и овны,
Грекысь не повны:
Кослунын позьӧ чунявны нӧк...