* * *

Ставным вӧлім мамлӧн пи...
Тӧдлім уна шогъяс.
Шогысь огӧ полӧ ми,
Уджалысь бур вокъяс.
Пессис «православнӧй» сар,
Ёна лои мудзны:
Уна сюрліс пемыд ар
Ывла вылын узьны.
Ӧні воссис гӧльлы туй — 
Восьтім уна вирӧн;
Сӧмын век на лёк буржуй,
Век на пиньсӧ йирӧ.
Важся сылы кӧть и жаль — 
Кулӧмӧс он ловзьӧд;
Миян весиг оз пов чаль — 
Миянӧс он повзьӧд.
Пӧрысь йӧзлы воӧ пом — 
Дырӧн-надзӧн бырӧ.
Пӧрысь пыдди быдмӧ том — 
Миян радыс тырӧ.
Вермас век на лоны кось — 
Абу ылын рӧкыд, — 
Век жӧ Рочмутӧ он босьт — 
Босьтныд лоӧ сьӧкыд.
Сэки быдӧн колям горт,
Мунам война вылӧ,
Ставным, кыдзи ӧти морт,
Сувтамӧ враг вылӧ.
Налы судзсяс миян вын,
Лябны огӧ кужӧй...
Кутас резны би да тшын...
Тайӧ кыв ог вуджӧй...
Тӧдам, кутшӧм права бур,
Шуда олӧм сиам...
Сӧвет понда пуктам юр, 
Видзам том Россия.
Коммунар оз некор бӧрд — 
Абу страшнӧ кулӧм;
Миян знамя югыдгӧрд,
Кулам ми сы улын.