I-й МАЙВойна быри. Шы ни тӧв. Оз нин кывсьы чорыд гым... Эгӧ тӧдлӧ коли тӧв. Воис тулыс — воши лым. Сыліс. Собор улын паськыд ва, Льӧм пу йылын дзольгӧ кай, Кӧчьяс сьылӧны: «ла-ла»... Воис праздник «Первой май» Ылысь. Тайӧ праздник кӧть и важ, Эз на волы татшӧм лун; Некор вӧчны вӧлі гаж: Вӧлі война, эз на вун Юрысь. Сизим во чӧж муніс кось — Йӧзлӧн пыр на киссис вир... Озыр кутшӧм вӧлі ёсь, Век жӧ вӧчны лои мир, Бурысь. Таво косьлы воис пом, Ӧні абу сійӧ шог; Быдӧн: пӧрысь йӧз и том Талун гажлы вӧчас мог — Сьылас... Кыдзи вӧрыд миян лӧз, Мыйта, дивӧ, сэні пу, — Сідз жӧ му вылын гӧль йӧз, Сымда йӧзӧс кутӧ му, Вылас. Налӧн мунӧ ӧти дум: Кыдзи вежны олан туй... Налы пыр на озыр кум Праздникъяслы потшис туй Нырнас... Таво, кыдзи быри кось, Быдӧн корсьны кутас бур: Кутны сымдаӧс оз позь, Сымда йӧзлысь вом он вур... Тырмас. Мича кайяс, сьылӧй гаж! Вӧчӧй вокъяслы бур пуд... Налысь вежӧй олӧм важ... Сьылӧй шонді улын шуд, Сьылӧй! Гажа праздник — Первой май! Тэнӧ тӧдӧ паськыд му... Ёнджыка сьыв, гора кай, Йӧзлы юӧр бурӧс ну, Ылӧ!
