КОМИ МУ БОСЬТЧАС

Коми муын уна олысь,
Бур йӧз пытшкын уна полысь:
	Сэні эмӧсь быдся сорт,
	Ӧткымыныс зэв лёк морт.
Лёк морт оз мун югыдінӧ,
Кыдзи вермӧ аслыс синӧ — 
	Сылы выль олӧм оз туй,
	Тшӧтш и йӧзлы потшӧ туй...
Со республика пӧ кутны
Лоӧ сьӧкыд — оз ков «шутны»,
	Коми кыв пӧ миян гӧль,
	Йӧзыд дуркӧсь — син ни пель...
Бур йӧз, налысь омӧль мойдӧм
Энӧ кывзӧ, прӧстӧ пойгӧм;
	Быдса бурыс миян эм:
	Стрӧйба вӧрыд быдмӧ тшем.
Кор республикаыд воссяс — 
Вӧлись олӧмыд и босьтчас:
	Лоӧ шуда Коми му,
	Содас, бурмас видз да му;
Сувтас пабрик, завод, кӧрт туй...
Воддза олӧм шусям чӧрту!
	Колӧ вежны оланног,
	Коми йӧзлы оз ло шог.
Велӧдчӧм йӧз миян уна,
Сӧмын война вӧлі мунӧ,
	Ӧні быдӧн локтас бӧр,
	Сӧмын уджав, зіля вӧр.
Оз кӧ кувсьы коми Виттор,
Коми кывйӧн гижас быдтор,
	Лоӧ сьылӧмыд не важ,
	Энӧ шогсьӧ — лоӧ гаж.
Энӧ тіргӧ, энӧ полӧ,
Ас республикаыд колӧ:
	Олӧм бурмас — лоӧ выль,
	Шуад: тайӧ пӧ тай збыль;
Огӧ кутӧ овны шогӧн,
Кутам овны коми ногӧн:
	Коми зонлы — коми ныв!..
	Коми йӧзлы — коми кыв!