ШЫБИТ ВАЖСӦ!

Шудтӧм войтыр, коми мортӧй,
Тэнӧ пемыд олан гортад
Важысянь нин помсянь помӧдз
Ылӧдлісны, пӧрйӧдлісны,
Кӧсйылісны вины, изны,
Ставсӧ бурсӧ вывсьыд кульны,
Ловъя вылысь гуӧ сюйны.
_____

Садьмы, чеччы, коми йӧз,
Вын-эбӧстӧ запты, чӧж!
Пансис вензьӧм, ыджыд кось...
Шыбит важсӧ, выльӧс босьт!
Ас йывсьыд тэ нинӧм он тӧд,
Тӧдін кӧ ӧд, вӧлін ён тэ.
«Важ олӧмыд мойдӧм кодь пӧ», —
Меным шуліс кодкӧ.
Коми йӧзлӧн зэв важ олӧм
Забыль мойдкыв вӧлӧм.
Коми мортӧй!
Важӧн коркӧ сюрс во сайын
Олін ягын вӧр-пу сайын;
Кӧин-ош моз вӧрын ветлін,
Кыйсьӧмӧн сэк кынӧм вердлін.
Эн на тӧдлы видзьяс-муяс,
Эн сэк кӧдзлы идъяс-сюяс.
Эз на вӧв сэк чер ни пила,
Лэчыд шы ни кӧрта вила.
Ошъяс вылӧ ӧтвылысь и торйӧн
Ветлывлінныд ёсьтӧм зорйӧн.
Мукӧд зверӧс, пӧтка кыйлін
Лэчкӧн, вужйӧн-ньӧвйӧн лыйлін.
Сэки пищаль эн на тӧдлы:
Пуля-н урӧс эн на вердлы.
Сэки эз на вӧвны каръяс,
Коми вылын ыджыд саръяс,
Исполкомъяс, урадникъяс,
Гырысь грездъяс, посни сиктъяс,
Керка-карта, мукӧдторъяс.
Шоныд дырйи олін вӧрын,
Лысъяс улын бипур дорын.
Кӧдзыд дырйи — кодйӧм муын,
Ошъяс моз жӧ пемыд гуын.
Кӧні визувтӧны юяс,
Керӧс вылын эмӧсь гуяс.
«Чуд гуясӧн» найӧс шуад,
Чудъяс гуасьӧмась гуас.
Вӧлӧмаӧсь сійӧ чудъяс
Коми йӧзлӧн пӧчьяс, дедъяс.
Пемыд вӧрын, гажа ягын
Кыдзи чачӧн ворсӧ кага,
Сідз жӧ пуысь вӧчлін енъяс,
Юрбитлін сэк налы.
Гашкӧ, сэки коми мортлы
Лӧсьыд вӧлі овны?
— Эз вӧв лӧсьыд! Быд здук лои
Лёк зверъясысь сылы повны.
Кыйсигъясӧн кынмӧм тӧдліс,
Ошлы киас уна-сь шедліс.
Уна-сь ошъяс мупытш гортсьыс
Вӧтлывлісны ортсӧ.
Кӧдзыд тӧлын лымъя дырйи
Семьякӧд сэк тірзигтырйи
Бипур дорын оліс мортыд — 
Эз вӧв сылӧн шоныд гортыд.
Пӧттӧдз тшыгъялӧмысь сюрлі,
Кынмӧмла да тшыгла уна кувлі.
Оз позь ошкыны зэв важся олӧм,
Вунӧдны нин сіӧс колӧ.
Садьмы, чеччы, коми йӧз,
Вын-эбӧстӧ запты, чӧж!
Пансис вензьӧм, ыджыд кось...
Шыбит важсӧ, выльӧс босьт!