ТӦДАН ОН, КОМИ НЫВБАБА?

Коми нывбаба! Кылан-ӧ тэ, мый кывсьӧ му вылас? Аддзан-ӧ, кыдз кыптӧ вылӧ, кыдз лунысь лунӧ содӧ, быдмӧ выль югыд керка — гажа бур олӧм? Аддзан-ӧ, кылан-ӧ, кыдз пессьӧны, тільсьӧны быд карын, быд сиктын уджалысь йӧз? Выль югыд керкасӧ вӧчӧны — гажа бур олӧмсӧ корсьӧны найӧ аслыныс. Дыр олісны уджалысь йӧз улын, няйтын, сьӧд пемыд вой кодь вӧлі налӧн олӧмыс. Эз лысьтны думайтны аслыныс бурсӧ, эз лысьтны весиг кӧсйыны лӧсьыд олӧмсӧ аслыныс. Велалісны асьнысӧ увтыртны, нинӧмӧ пуктыны. Пемыдінын шонді югӧртӧм олӧм косьтіс налысь вемсӧ, виис налысь долыд бур думсӧ. Медся ёна важ оланногыс личкыліс миянӧс, нывбабаӧс. Важӧн нин бӧрӧ коли сьӧд пемыд войыс, важӧн нин уджалысь йӧз шыбитіс пельпом вывсьыс став нартитысь-пӧдтысьсӧ, важӧн нин кымӧр улысь петӧма шонді, югъялӧ-дзирдалӧ — индӧ гӧль йӧзлы туй гажа шуда олӧм дінӧ, а нывбаба пыр на оз лысьтны юрнысӧ лэптыны, оз лысьтны синнысӧ восьтыны. Тырмас узьныд и тэныд, коми нывбаба! Ыджыд удж тэнӧ виччысьӧ! Эштӧма врагъяскӧд косясьӧм. Овмӧс лӧсьӧдны босьтчӧмаӧсь уджалысь йӧз. Ёна нин дӧзмин тэ нинӧм абутӧм олӧмсьыд — босьтчы уджавны ачыд тшӧтш, видзӧдлы паськыдджыка ылӧджык, отсав выль бур олӧм лӧсьӧдысь Сӧветскӧй власьтлы. Он кӧ куж на ӧні уджавныс — велӧдчы, эн шу, оз пӧ менам артмы. Тэ сэтшӧм жӧ морт, тӧлка, вежӧра, югдӧдыштан кӧ неуна вежӧртӧ — артмас быдтор. Удж вылӧ, коми нывбаба! Выль долыд олӧмлань!

Коми ныв.