И3МӦМ СИНВА
— Алло! 33-19-87?
— Да.
— Москву заказывали?
— Да.
— Соединяю, у Вас 2 минуты.
— ....
— Алло, алло!
— Да.
— Это Вы?
— Да.
— Срочно вылетайте...
— Что случилось? Объясните, что случилось?!
— Ваш друг...
— ....?
— Погиб.
— Что-о?
— ....
— Говорите! ...Алло! ...Не молчите!
— .....
— Алло. 33-1987, извините, но Ваше время закончилось. Разъединяю.
— Алло, телефонистка, алло!
— ....
* * *
Колӧ:
а) сьӧм (уна-ӧ? 6 млн? 7?);
б) ньӧбны билет (самолёт? поезд?);
в) корны отгул (3 лун? вежон?);
г) сьӧрысь босьтны: паспорт, записнӧй книжка, ручка, 2 дӧрӧм, гач, расческа, кичышкӧд;
д) .....?
Сьӧм:
1. мунны (самолётӧн) — 900 тыс.
2. локны (поездӧн?) — 200 тыс.
З. горт (1 шт.) — 1,5 млн?
4. венок (1 шт.) — 500 тыс.?
5. морг — 1 млн?
6. такси — 300 тыс.
7. крест (кӧрт) — 500 тыс.?
8. кладбище (крематорий?) — 1 млн?
Артмӧ: 900+200+500+300+500=2400
1,5+1+1+1=4,5
Ставыс: 2,4+4,5=6,9 + колӧ и овны + 1 млн = 7,9 млн руб.
Эм:
а) сберкнижка — 3 млн
б) удждон? (гл. бух. — топыд морт, но гашкӧ, сетас?) — 2 млн
в) тӧдсаяс — ..... ?
г) ......?
Колӧ удждыны — 3 млн
Кодлысь:
а) Пилатов — ....?
б) Мария -
в) ...?
г) Бесов? — .......
д) Христофоров?
Удждісны:
а) Пилатов. Советская, 58, 4 судта, 37 каб. Прокурор. Бур морт, веськыд. Оз ю. Видысь-бӧрдысь абу. Олӧ ӧтнасӧн. Удждоныс ыджыд, ас кадӧ вештӧны — оз мукӧдлы моз. Бурӧ уськӧдчӧ — сетіс. 1 млн. Эн пӧ вунӧд, пырав, аттьӧ. Аттьӧ, прокурор.
б) Мария. Телефон: 33-22-00. Оз босьт трубкасӧ. Абу, абу авъя Марияыс. Мунӧма. Вичкоӧ, буракӧ. Енмӧс ыдждӧдлӧ. Эскӧ — писӧ, сёрӧн, нелямын гӧгӧр арӧсӧн чужтіс, Енмыс сетӧма да, — эскӧ. Енмыслы. Вичкоӧ ветлӧ.
в) — Бесов?
— У-у?
— Эм?
— Уна?
2000000 -00
— Е-сс ...
— Сетан?
— Бергӧдан?
— Да...
— Кор?
— Тӧлысь мысти.
— 200 %!!
— О’кей...
г) Христофоров. Медвылын. Чердакас. Кывйыс ӧдва артмӧ, гажа — художник! Чукӧртӧма. Доз вылӧ. 13 тыс. 3 руб. 1 коп. оз тырмы. Сылысь оз позь — грек — бӧръясӧ мырддьыны.
Картинаяссӧ позьӧ вузавны:
а) “В.И.Ленин”. 1970. — 700 руб. 00 коп.
Х/М, 100х150
б) “Л.И.Брежнев”. 1977. — 500 руб. 00 коп.
Бум. гуашь, 30х40
в) “М.С.Горбачев”. 1986 — 2000 руб. 00 коп.
кар. гуашь, 20х30
г) “Б.Н.Ельцин”. 1993. — 1.000 $
бум. уголь
P.S.: Гл. бух. сетіс удждон 3 000 000 минус 12 % подоход. налог минус 1 % проф. взнос = .....?
* * * * * *
* * * *
“...” __________19__ г. Утверждаю:
МЕНЮ
1.Чери. 200г. 15 000 руб.
“... Хэмингуэй”. Хэм. 1899–1961... “Старик и море”... пӧль да саридз, “Лайф” журнал, 1952 во ... сійӧ кыйсис кӧкъямысдас нёль лун нин да эз на кый весиг ӧти чери... ньӧби эськӧ шудсӧ аслым, вузалӧны кӧ кӧнкӧ сійӧс ... мортсӧ бырӧдны позьӧ, но венны сійӧс — он вермы... "
2. Нянь ... г ... руб.
“ ... Вӧлі Иисус... да вит нянь тупӧсь ... да кык чери ... да вит сюрс морт ... да юксис Иисус няньсӧ да черисӧ ... да сёйисны йӧзыс пӧтмӧныс ... да коли на няньыс...”
3. Ва
“... Н2О ... химия ... Менделеев ...”
4. Яблӧг. 1 шт. 1000 руб.
“...Вӧлі Адам ... да лёк да бур ... да яблӧг... да Ева ... да лӧгасис Енмыс да вӧтліс да шуис ... вӧчӧма муысь да муас и воан ... нинӧмӧн вӧлін да сыӧн и лоан...”
5. Сов
“... натрий хлор ... синва, измӧм синва...”
ІІ
Эргыштіс, домалӧм пон моз, эргыштіс да сэсся выныштчис, орӧдіс домсӧ, мыніс кутӧдсьыс, тойыштчис, качис. Самолётыс.
Ыркмуніс пытшкыс, топаліс сьӧлӧмыс. Вывланьӧ, вывланьӧ. Ылӧджык, мусьыс ылӧджык. Кымӧр пӧвсттіыс, пемыдтіыс — енэж югыдас, лӧзас, сӧстӧмас.
Личмуніс сьӧлӧмыс, лӧнис. Вугыртіс. Узьӧ. Вӧталӧ олӧмсӧ — енэжас.
* * *
Мыйла, мыйла тайӧ вӧтсӧ вӧталан? Он тӧд, ачыд он тӧд. Он тӧд, кор медводдзаысьсӧ вӧталін. Кӧкъямыс арӧсӧн? Сёрӧнджык? Кымынысь вӧталін: куимысь, дасысь, сёысь? Унджыкысь? Ачыд быдман, верстямман, пӧрысьман, а вӧтыс — важкодьыс, ичӧтдырсяыс.
Сійӧ вӧтчӧ, локтӧ, суӧ. Войнас, лун шор лунӧ. Во мысти, дас во мысти. Талун, аски, аскомысь.
* * * *
“...Аддза ачымӧс. Меным кӧкъямыс арӧс, буракӧ... Лэба, бордъяс вылын лэба. Лэбач. Уліын — керканым, чужан сиктӧй, пармаыс, юыс. Тӧла, кӧдзыд — выліас. Улӧджык лэчча. Руа, еджыд руа — разалӧ, кизьӧрмӧ — тыдалӧ. Аддза, аддза кодӧскӧ — мыгӧрсӧ, кокни вуджӧрсӧ. Валъялӧ: чужӧмыс, синъясыс, чукыръясыс, дзормӧм юрсиыс. Педӧр Анна.
Кияссӧ, сарӧгӧсь, чукля чуньяса кияссӧ мелань нюжӧдӧ. Кыйны кӧсйӧ менӧ, уськӧдны. Эн вӧрӧд, эн! Лэбавны кӧсъя, лэбавны! Эн вӧрӧд, эн!”
* * * * *
— Педӧр Анна? Абу нин ловъя. Во кызь нин, буракӧ, кыз му улын. Кӧкъямысдасӧдз, буди, оліс. Тырмас... Кхе-е. Коркӧ ставным сэні лоам. Дерт, кӧкъямысдасӧдзыд миян овсьӧма. Татшӧм олӧмнад. Пузувтісны олӧмсӧ да... Б...ясыд! Олӧм пуксис. Енмыс кӧ ас дорас босьтыштас — сё слабог! Тшыгла виньгыртчӧм дорысь. Сё збыль, эн серав. Кхе-е. Кулыштан да — шог ни печаль. Кхе-е. Дась, ставыс дась. Гортсӧ и крестсӧ вӧчӧма. Тонӧ, посводзас, виччысьӧны менӧ. Kxe-е. Пӧвъясыс кызӧсь, сирӧд козйысь. Во кызьтӧ оласны, оз сісьмыны. Кхе-е. Крестыс, ог тӧд, дыр-ӧ сулалас. Во кызь — уна вылӧ. Сэсся вежны ковмас — вежысьыс кӧ, быттьӧ лоас. Кхе-е. Кӧрт крестыд, дерт, нэмсӧ олас, изйысь вӧчӧмыд и... Кхе-е... Пусьыд бурджык, мичаджык на и. Изсьыд сьӧкыд, личкыны кутас. Сэні эськӧ, кыз му улад, ставыс нин веськодь лоас да. Педӧр Аннаыд тай со кызь во нин мӧдаръюгыдас. Ог тӧд, кыдзи и мый сэні. Вӧтад уськӧдчывлӧ да, Педӧр Аннаыс нинӧм оз висьтав? Кхе-е... Вӧтӧн сідзкӧ волӧ. Кхе-е. Мед, кулӧмасьыд эн пов. Ловъясьыс, ловъя мортсьыс повны колӧ. Кхе-е.
* * * *
“... Мортыс оз ов. Мортыс вӧталӧ олӧмсӧ — таладоръюгыдсасӧ и мӧдарсасӧ. Вӧталӧ...”
* * * *
— Через двадцать минут наш самолет приземлится в аэропорту “Шереметьево”. Температура воздуха в Москве 20ºС.
Просим застегнуть ремни.
* * * *
ІІІ
— А, воӧмныд. Так. Со, кырымасьӧй да босьтӧй.
Паспорт. Серия VІ-EA №426339. Видзӧдлӧй. Сійӧ?
— Да.
— Библия... О-о-о! Важ! 1898 вося. Татшӧмыд дона сулалӧ. 500 000 кымын. Абу донтӧмджык.
— ...?
— Перна. Эзысь. Сылӧн?
— Ог тӧд.
— Военнӧй билет. Серия ... № ... вӧч 00014 ... сержант ... отличник боевой и политической подготовки ... специалист І класса ... рост 178 см ... вес 77 кг ... награды ... медаль “За боевые заслуги” ... Афган?
— Афган? Эз висьтавлы...
— Мда... Сэтысь бергӧдчӧма, а тані... Пенсионнӧй книжка. № 089049. 100 % льгота на лекарства. Бесплатный проезд в пределах г. ... Имеет право на получение 50 % скидки на проезд по железным дорогам ... Ранение?
— Юрыс вӧлі...
— Мый?
— Этійӧ...
— А-а, гӧгӧрвоана. Шиза?
— Ну-у... эз эськӧ...
— Уналӧн сэтшӧмыс. Вӧлі и эм. Вӧлӧмаӧсь сэні, локтісны да чайтісны — налы ставсӧ позьӧ. Этшсӧ оз тӧдны. Би пыр мунісны, а вежӧрныс — кагалӧн мында. Кызь арӧсыд арлыд али мый? Томӧсь да йӧйӧсь.
— Сійӧ эз вӧв том. 33 таво тырис.
— Бать-мамыс эм?
— Абу. Детдомын быдмис.
— Дзебысьыс? Тэ?
— Да.
— Ӧтнад?
— Ӧтнам.
— Москваын дзебан?
— Ог на тӧд.
— Кремируйт. Ме ног, тадзисӧ бурджык лоас. Мӧдногыс оз во. Гожӧм. Моргас кӧзӧдыс лёка уджалӧ. Вермис тшыксьыны. Кадыс коли и... Талун кутшӧм луныс? Июнь. 29-ое. Кык вежон нин куйлӧ.
— Кык?
— Да, кык.
— А-а... мыйла нӧ... та дыра?
— Дырджык овлӧ. Сэсся, оз кӧ босьтысьыс ло, дзебӧны — за счёт государства. Гуаласны да весьтас — №... невостребованный труп. Оз ков мортыс.
— А, мыйла нӧ...?
— Водзджык эгӧ юӧртӧй?
— Да...
— Бюрократия. Миянсянь гижӧдыс ӧтилаӧ, насянь — мӧдлаӧ. Сэсся коймӧдлаӧ. Кытшӧдлӧ-гӧгрӧдлӧ. Вабергач.
— Со лыддьы. Ставсӧ гижӧма: коді мый кывлӧма, аддзывлӧма, кор да кӧні. Абу тальыштӧмаӧсь, абу виӧмаӧсь. Ачыс. Ачыс мунӧма олӧмсьыс, енмыс кӧрӧма да.
ІV
Вӧлі мусаӧн, а ӧні — ыркмунӧма сьӧлӧмыс. Казьтывлӧмыс и кольӧма — вежӧрас, абу сьӧлӧмас:
Тшын да пӧим, да шом.
Абу. Бырӧма. Пом.
Йи да гыӧр, да пуж.
Вӧлі. Мӧдысь оз чуж.
Шог да гажтӧм, да нор.
Сёр нин, вывті нин сёр.
Муслун мӧдысь оз чуж,
Он кӧ видзнысӧ куж.
Чайтіс, мыйкӧ кольыштӧма на — абу. Кӧдзалӧма сьӧлӧмыс, пужъялӧма.
* * * *
— Алё...
— Слушаю.
— Здравствуй, это я.
— Ты?
— Да, милая.
— Надолго?
— Пока не знаю...
— Приезжай.
— Нет, не могу.
— Почему?
— Ну... Одним словом не скажешь. Давай встретимся. На Пушкинской. В 16.00.
— Хорошо...
— Жду.
* * * * *
Абу вежсьӧма. Пукалӧ орччӧн — матыс, тӧдса, — синъясыс, сёрниыс, вомдоръясыс, ловшыыс. Нюмъялӧ меліа, небыда. Юасьӧ: кысь да кытчӧ, кыдзи да мыйла? Мыйла? Колӧ. Кытчӧсюрӧ ветлыны. Мыйсюрӧ вӧчны — ньӧбасьны, шуам. Ньӧбасьны? Да. А сэсся? Сэсся видзӧдлам, кыдзи мый водзӧ.
* * * * *
— Костюм. 200 $. 50 размер. Кызыштӧмыд да он нин тӧр. Колӧ 52-ӧд. Гӧрд? Турунвиж? Сьӧд?
— Сьӧд колӧ.
— Сьӧдыс вывті пемыд. Колӧ югыдджыкӧс. Со, пӧим рӧмаыс. Пасьтавлы.
— Кывзы, но...
— Эн ыждав. Тайӧ козин. Месянь.
— Но...
— Эн пыксьы, пасьтавлы! Лӧсяліс? Абу векни? Мышнад бергӧдчыв. 3эв мича. Тэдлы вылӧ быттьӧ вурӧма.
— ...?
— Дӧрӧм? Колӧ югыдлӧзӧс корсьны. Вот 30 доллар. Абу ёна дона и бур. Ньӧбам. Галстук? Этійӧс босьтам. Серасӧ. Кӧм. 42? Эг на вунӧд?
— Кывзы, но меным нинӧм оз ков... нинӧм...
— Колӧ. Эн пыксьы. Но?
— Тӧдан, ставыс тайӧ... оз меным ков, а...
— Ставыс тайӧ — тэныд. Козин. Бур вылӧ. Коркӧ, гашкӧ, бурӧн казьтыштан менӧ. Али мустӧмми дзикӧдз?
* * * * *
200 + 30 + 100 + 20 = 350. 350 х 4550 = уна артмӧ?
* * * *
“Спасибо за все. Деньги на столе. Извини, но по-другому не могу. Не обижайся на меня.
Уезжаю сегодня ночью. Целую.”
V
Вайис моргас — аслыс козьнавлӧм кӧлуйсӧ — сетіс. Час, час пӧ, паськӧдам ёрттӧ, пуктам гортъяс да сэсся петкӧдам.
* * * *
— Это он?
— По бирке — да. ФИО, № — все совпадает.
— Он сильно... изменился... то есть...?
— Хотите посмотреть?
— Нет... не надо...
— Попрощались?
— Да.
* * * * *
Пӧдласис горт бӧрсяыс сьӧдӧн эжӧм ӧдзӧсыс. Би пыр муніс. Пӧим, руд пӧим коли.
* * * * *
Книга рекордов Гиннеса. САМЫЙ БОЛЬШОЙ КРЕМАТОРИЙ.
Николо-Архангельский крематорий в Москве оборудован 7 двойными кремационными печами. Его строительство было завершено в марте 1972 г. Он занимает площадь 210 га, и в нем имеется 6 нерелигиозных траурных залов, которые используются при атеистических похоронах.
* * * * *
Босьтіс ёртсӧ. Кольӧм пӧимыс — гырничӧ тӧрӧма. Тубыртіс жугалӧмысь, сюйис сумкаӧ.
Туйӧ петісны.
VІ
Поездыс ньӧжйӧ мунӧ, тэрмасьтӧг. Мед. Кытчӧ тэрмасьнысӧ? Мыйла? Нинӧмла. Оз ков. Тэрмасьнысӧ. Оз ков. Нинӧмла.
* * * * *
Перйис пуклӧс увсьыс, кӧлуй пуктан вежӧссьыс — эз-ӧ жугав гырничыс. Абу нинӧм лоӧма. Дзонь. Серӧдӧма-мичмӧдӧма. Югъялӧ.
Мича пӧ — кага, ар нёля, матыстчӧма да шуӧ... Мича, кагукӧй, мича. Позьӧ, позьӧ пӧ пытшкас видзӧдлыны?
Оз, оз позь, кагукӧй. Водз на.
* * * * *
Здрась-те! Здравствуйте. Здесь занято? Нет, не занято. Куда едем? Туда... И я туда! Как звать? Вася? А меня Федя. Так вот, Вася, слушай анекдот...
Решил как-то Леонид Ильич на первое апреля разыграть Черненко и говорит ему: “Здравствуйте, товарищ Суслов”. А тот ему: “Так Суслов же помер!” — “Тогда, товарищ Суслов, до свидания!”
Правда смешной анекдот? А, Вася?... Да пошел бы ты, Федя, подальше...
* * * *
Оз, оз сэсся вермы. Колӧ вунӧдны ставсӧ, вунӧдны. Муртса кежлӧ. Талун. Ӧні. Колӧ, колӧ узьны да вунӧдны ставсӧ. Узьны, узьны, узьны.
VІІІ
— Тэ?
— Ме. Эн пов.
— ...
— Эн бӧрд. Мый лоны, лоӧма. Эн бӧрд.
— Тэ...
— Абу ловъя. Вӧтын локті.
— ...!
— Тӧда.
— ...?
— Повзин. Тӧда, повзин. Видзӧдлынысӧ. Гортъяс. Коді сэні вӧлі — ӧніӧдз он тӧд.
— ...Тэ-э...
— Локті висьтавны тэныд, мый...
— ...??
— Повзин? Эн, эн пов. Муна, муна сэсся...
* * * *
Усьӧма, джоджас усьӧма. Грымгысьӧма. Орччӧн узьысьыс, дерт, садьмӧма да матькӧ. Йӧймӧдін пӧ. Лёк вӧт вӧтасин али мый — горзан вой шӧр войӧ.
Да. Вӧтассьӧ да, лоӧ тай вӧтавнысӧ, мый сэсся вӧчан.
Пасьтасис. Петіс куритчыны. Дорвыв куимӧс шпуткис, вукйӧдмӧныс лоис. Ӧшиньсӧ восьтіс, лолыштіс. Кокньӧдыштіс.
Мый чӧртла татшӧм вӧтыс вӧтассьӧ? Мудзӧмысла? Ӧтиторсӧ мӧвпалӧ да сійӧн? Колӧ шойччыштны, вунӧдчывны. Гашкӧ, юыштны — бурджыка узьсяс?
Пырис. Восьтіс дозсӧ, кисьтіс. Стӧкан джынсьыс унджык. Юис — ӧти лэптӧмӧн, орлытӧг. Лӧсяліс, буракӧ.
Сэсся, мӧвпалыштіс да, перйис пуклӧс увса вежӧсысь сумкасӧ. Восьтіс, видзӧдліс пытшкас — сэні абу пӧим гырничыс. Перйис сійӧс, разис тубрассӧ. Гырнич вевтсӧ видліс — абу-ӧ восьса? Топӧдыштіс вевтсӧ — а вот мыйла, ачыс эз эськӧ куж висьтавнысӧ. Бурджыка, топыдджыка тубыртіс сьӧд сатин дӧранас. Бӧр сюйис.
Сумкасӧ эз нин юрладорас пукты, а бокӧджык, кокладорланьыс. “Иже еси на небеси, да святится имя твое...” — ас кежсьыс, вомгорулас лыддьӧдліс, мыйта тӧдіс, да водіс.
Гашкӧ, оз нин сэсся лёк вӧтыс вӧтась?
* * * * *
— У-у-у... У-у-у...
— Кылан?
— Тӧлыс?
— Абу.
— Понъяс омлялӧны?
— Оз, пиук.
— Кодъяс нӧ?
— Кӧинъяс, буракӧ...
— Кӧ-и-инъяс!? Ой!
— Эн пов, керкаад оз пырны.
— Оз?
— Оз. Кильчӧ ӧдзӧсным игана да, кыдзи пырасны?
— Жугӧдасны.
— Сювныс петас — жугӧднысӧ.
— А ӧшиньясӧдным?
— Оз судзны. Эн пов. Узь.
— У-у-у... у-у-у...
— Бара омлялӧны.
— Узь. Найӧ, колӧкӧ, войбыд омлявны кутасны да.
— Мыйла нӧ омлялӧны?
— Код тӧдас, мыйла.
— Гажтӧм да сійӧн?
— Тшыгӧсь.
— Ой, пола! Шебрас улӧ дзебся.
— У-у-у... у-у-у...
— Ылынӧсь?
— Ёна ылыныс эськӧ абу да.
— Лый.
— Найӧс лыян. Вижля кодь наянӧсь да.
— Бусконым увтас!
— Ог тӧд бара-й. Буракӧ, бӧжсӧ лэдзӧма да ачыс муртса ловъя. Посводзын йӧжгылясьӧ, оз увтчы весиг.
— Полӧ мӧй?
— Ог тӧд. Оз тай кыв-а.
— Оз пов. Сійӧ ён. Вермас кӧинтӧ.
— Вермас, вермас. Узь.
— Дзебся. Шебрас улас.
— У-у-у... у-у-у...
* * * * *
Восьтіс синъяссӧ. Тӧлыс, ӧшиньыс воссьыштӧма да, воча локтысь поездыскӧд паныдасигӧн омлялӧ: у-у-у... у-у-у...
Оз узьсьы. Ӧзтіс бисӧ, юр весьтас лӧсьӧдӧмсӧ — муртса-муртса югзьӧдӧ. Кадыс 3.45. Босьтіс книга — войсӧ коллявны:
Пемыд вой шӧрын садьма да —
чужӧмӧ рытыв вой швичкӧ,
Ыджыд пуяссӧ пӧрӧдӧ, томъяссӧ му бердӧ личкӧ,
Ӧти гудырӧ гудралӧ
лунсӧ да войсӧ.
Гигзьӧ-сералӧ, омлялӧ, бӧрдӧ да ойзӧ.
Пемыд вой шӧрын садьма да —
олӧмыс кок улысь пышйӧ.
Югыд мӧвпъясӧй пышйӧны, мӧвпъясӧй —
яндысьтӧм шышъяс.
Пемыд вой шӧрын садьма да —
сьӧлӧмын омлялӧ кӧин.
Югыд кодзулӧй усьӧма, сотчӧма.
Кольӧма — пӧим.
* * * * *
Мунӧ поездыс — ньӧжйӧ, тэрмасьтӧг. Дзуртӧ, ышлолалӧ, мудзӧма.
* * * * *
— Мӧдысь локті. Бӧръяысь.
— ...
— Тэнад вӧт.
— ...?
— Эн, эн чӧв ов. Шу мыйкӧ.
— ...
— Муна?
— ...
— Муна. Дзикӧдз кежлӧ. Шонді югыдас.
* * * * *
Садьмис. Синсӧ ёрӧ — шондіыс — ышӧдӧ, лелькуйтӧ сьӧлӧмсӧ. Югдӧдӧ ловсӧ, кыпӧдӧ.
Войся вӧтыс дзебсьӧма, кӧнкӧ пыдын, пытшкас — кыйӧдчӧ. Виччысьӧ ассьыс кадсӧ.
* * * * *
ІX
Висьтала пӧ тэд,
Тӧдны кутан мед:
Кутшӧм лоӧ нэмыд —
югыд али пемыд;
шогсьӧмсӧ и гажсӧ,
аскисӧ и важсӧ;
кутшӧм сьӧлӧм-лолыд,
мыйысь сылы долыд;
коді дорйӧ тэнӧ,
увтыртӧ ли венӧ.
Висьтала пӧ тэд,
тӧдны кутан мед.
Ог пӧ висьтав тэд,
он кут тӧдны мед:
Корджык, дона мортӧй,
тэла воас ортыд,
кыдзи тайӧ лоӧ,
кӧні, кутшӧм воӧ;
адӧ или райӧ
усян али каян —
ов да бӧрйы ачыд
усьны али качны.
Ог пӧ висьтав тэд,
он кут тӧдны мед.
* * * * *
ТРУДОВАЯ КНИЖКА. АТ — ІІІ. № 198901.
Фамилия __________
Имя __________
Отчество __________
СВЕДЕНИЯ О РАБОТЕ
Приказ № 1
от 06.07.
19........ г
06.07.19... г.
Олӧмыс —
олана-вылана,
асъядор сьылана,
сьӧлӧмӧн кылана,
гажа на,
мыла на,
лолӧйлы колана,
няня
и сола на, —
олана!
Таладор югыдыс —
колӧ на!
Ола на!
Мӧдарас —
вола на...
Приказ № 2
от 06.07.
19........ г
06.07.19...г
Лолӧн, сьӧлӧмӧн — тась
тайӧ сынӧдас, руас,
вӧрас, енэжас, муас.
Лолӧн, сьӧлӧмӧн — тась.
Татчӧ кольччыны дась —
небыд туруныс пиӧ,
войся бипурлӧн биӧ.
Лолӧн, сьӧлӧмӧн — тась.
Татчӧ кольччыны дась —
Корлӧн шарӧдчӧм шыас,
лӧня валъялысь гыас.
Лолӧн, сьӧлӧмӧн — тась.
Татчӧ кольччыны дась!
Да вот колӧ тай мунны,
тшын моз бырны
да вунны.
XІ
Джӧмдіс поездыс, сувтіс, воис — помас — узьӧ, вӧталӧ олӧмсӧ.
* * * * *
Восьтіс, видзӧдліс пытшкас — пӧим — пуктіс сэтчӧ эзысь пернасӧ — пӧдлаліс — пуктіс — пӧим тыра гырничсӧ — гуас. Тыртіс. Сувтӧдіс крестсӧ.
Сулыштіс ӧтнасӧн. Енэжа-муас. Олӧмас. Таладор югыдас. Сулыштіс.
* * * *
— КОДӦС ДЗЕБИ, вирдыштіс юрас, — КОДӦС? ... КОДӦС? КОДӦС?
* * * * *
ОЛӦМЫС АБУ: 1 + 1 + 1 = 3. ОЛӦМЫС: 1 + 1 + 1 = 1.
* * * * *
