* * *

Олӧмыс курдӧма,
		олӧмыс курыдсьыс-курыд.
Олӧмыс кольмӧдӧ,
		олӧмсьыс бергӧдчӧ юрыд.
Олӧмыс ваймӧма,
		кольӧма кольмӧдысь чадыс.
Олӧмыс чадалӧ,
		воӧма чадалысь кадыс.
Олӧмыс кольӧма,
		кольӧма сьӧдасьӧм шомыс.
Бырӧма шоныдыс, бырӧма.
			Воӧма помыс.
Воӧма помыс да,
		выльысьсӧ он нин тай лӧсьӧд.
Лоӧма кӧдзыд да,
		он нин тай выльысьсӧ пӧсьӧд.
Кусӧма горйыс да,
		кӧсъян кӧть, выльысь он ломты.
Кӧдзыд да,
		ловтӧ да сьӧлӧмтӧ оз нин тай шонты.
Вошӧма, бырӧма
		бурӧдан, ловзьӧдан выныс.
Кольӧма кодзула енэжын
			мӧвкъялысь тшыныс.
Кольӧма мӧвкъялысь тшыныс да,
				сійӧс на разӧдас тӧлыс, —
сійӧс, мый олӧмын, лолын да сьӧлӧмын
								вӧліс...