* * *

Скӧрмӧм енэжыс камӧдчис гымӧн
			да сьӧласис биӧн.
Петыр Павелыс тӧв нырӧн муніс
			да коясис йиӧн.
Петыр Павелыс йӧктіс —
			да гыаліс, валъяліс юыс,
вӧрис, потласис
		енэжыс, сынӧдыс, муыс.
Кыптӧм тӧв нырыс
			пуяссӧ ньӧввуж моз зэвтіс,
Менам керкаӧй ружӧктіс,
			ратшмуніс вевтыс.
Пӧдса ӧдзӧсыс ойкнитіс,
			ымӧстіс стеныс.
Усис
	пельӧсын кыксё во сулалысь еныс.
Лолӧй лэбач моз тіраліс,
			ыркмунліс сьӧлӧм —
Петыр Павелыс — лышкыд,
			да повзьӧдчысь вӧлӧм.
Мусӧ, васӧ да енэжсӧ
			ӧтнасӧн вермис.
Йиа бушколӧн муніс да —
			вӧлисти зэрмис.