КЫМӦРЪЯС

Гымаліг,
		повзьӧдчиг
			бокӧджык кежӧ
на пиысь ӧти.
Чарда да гыма
	сійӧс нин вежӧ,
			крепыдджык щӧтя.
Ньӧввуж моз зэвтчӧма,
	гымньӧвъяс
			лыйлӧ,
быттьӧкӧ Пера...
Лэбӧны ньӧвъяс,
		но кымӧрыс мыйла
абу жӧ зэра?
Ичӧтик кымӧр со
	енэжӧ качис.
			Качис — и зэрӧ.
Абу кӧть зымӧдчысь
		сямлуннас ачыс,
уджсӧ тай керӧ.
Зэрӧ да зэрӧ,
			но мед эськӧ
дӧзмытӧдз оз жӧ.
Мед эськӧ ылыстчас
			казявтӧг,
локтігас моз жӧ.