ВӦВЪЯС

Лэбӧ пурт кодь лэчыд гӧлӧс
морӧс кудйысь.
Пӧльлӧн пӧльлысь вошӧм вӧлӧс
корся лудысь.

Кӧнкӧ ылын, оз зэв гора,
гудӧк ворсӧ.
Пӧльлысь вошӧм гӧрд вӧв кора.
Горза, горза…

Батьлӧн вӧлыс оз жӧ гӧрӧкт
горзӧм вылӧ.
Сӧмын локтӧ веж луд шӧрӧд
аслам, кылӧ.

Кыа бордъяс увті вӧлӧн
ӧдйӧ рӧдта.
Лэба пӧльлӧн ыбъяс пӧлӧн.
Шогӧс пӧдта.

Мыйта вӧлӧс ылі лудын
воштім-колим!
Пессьӧ, горзӧ морӧс кудйын
томдыр вӧля.