ПИЛЫДона пиӧй, кор ме кула, гуав кыдз да пелысь улӧ. Пиӧй, кодйы менсьым гуӧс меӧн водзвыв бӧрйӧм муӧ. Еджыд кыддзыс, пелысь пуыс лёксьыс сайӧдасны гуӧс: коркӧ важӧн, вояс сайын, ачым вужйӧдлі ме найӧс. Еджыд кыдзсӧ пукті майын. Пелысь пусӧ арнас вайи. Менам дона кыкнан пуыс, натӧг гажтӧм Коми муыс. Олі-вылі — сьӧлӧм кывзіс кыдзлысь гажа сьыланкывсӧ. Жугыль пелысь пусӧ шуи бӧръя туйӧ колльысь пуӧн. Пиӧй, кодйы менсьым гуӧс кыдз да пелыськостса муас, медым чужан-кулан часӧй быд во лоӧ ловъя паса. Гуӧй оз кӧ мусмы тэныд, кӧсъян вунӧдны кӧ менӧ — сэки, сэки лэчыд черӧн пелысьсӧ да кыдзсӧ керав. Мыйӧн пӧрас кыкнан пуыс, пиӧй, пасйышт менсьым гуӧс. Кыдз да пелысь пусьыс меным вӧчышт кресттор — дыр мӧй тэныд? Сэсся, крестсӧ пуктӧм бӧрын, ветлы, пиӧй, вичко шӧрӧ. Югыд вичко шӧрас сэні пукты сись да казьтышт менӧ.
