ШУӦМ КЫВНЫМ МУӦ УСЬӦ

Шуӧм кывным муӧ усьӧ.
Сэсся рудзӧг петас мусьыс.
Сэсся воӧм бӧрас сійӧс
изас коми мортлӧн киыс.

Сэсся пӧрысь коми пӧчӧ
рудзӧг пызьысь няньшом вӧчас.
Сэсся, няньшомыс кӧ туяс, —
пачӧ пӧжалантор сюяс.

Сэсся, пачсьыс перйӧм бӧрын,
пуктас няньсӧ пызан шӧрӧ.
Рудзӧг няньсӧ пуктас сэсся
пельӧсувса енлы весиг.

Сэсся шойна вылӧ мӧдас.
Сэні куйлӧ вужйыс-рӧдыс.
Налы рудзӧг няньсӧ ваяс.
Кутас казьтывлыны найӧс.

Накӧд пукалыштӧм бӧрын,
гортас мӧдас мир туй шӧрӧд.
Рудзӧг няня пызан дорӧ
сиктса медбур йӧзӧс корас.

Гашкӧ, юасьтӧг да кортӧг
пырас пӧрысь пӧчӧ ордӧ
мортӧс виысь, вина юысь,
ёрсьысь-керсьысь, лёк кыв шуысь.

Гашкӧ, Васа сэні лоас.
Гашкӧ-й, Вӧрса сэтчӧ воас.
Гашкӧ, восьса ӧдзӧс пырыс
сэтчӧ Омӧльыс тшӧтш пырас.

Гашкӧ, татшӧм гажлун дырйи
лоасны и багатыръяс.
Кума-кама, тарки-йирки
пырас Пера. Локтас Йиркап.

Локтысьяслы оз ло помыс.
Лоас пӧрысьыс и томыс.
Тима Вень и Виттор Савин —
татчӧ чукӧртчасны ставӧн.

Ставныс тӧрӧдчасны найӧ
рудзӧг няня пызан сайӧ.
Гашкӧ, пызан саяс сэні
кодкӧ казьтыштас и менӧ.

Мед жӧ эськӧ рудзӧг тусь моз
шуӧм кывйӧй муас усяс...
Мед жӧ нэмъяс мысти сійӧс
изас коми мортлӧн киыс.