* * *

Кокньыд да лӧсьыд! И лэба ме водзӧ.
Тіпкӧны ичӧтик сьӧлӧмъяс орччӧн.
Велӧдчӧй, мусаяс, ёнмӧдӧй бордъяс!
Коді нӧ коднантӧ ӧдйӧджык ордъяс?

Енэжсӧ аттьӧала сетӧм вынысь,
Пасьмунӧм бӧрся мый качӧдчи выльысь!
Рудовлӧз кымӧрыс вӧвлытӧм рӧшкыд,
Улынджык йӧжгыльтчӧма ӧшкамӧшка —

Енсетӧм рӧмъяснас гажӧдӧ синтӧ!
Тырмымӧн шудыс! Ог содтав, ог чинтав.
Шевкнита бордъясӧн — муюгыд матын!
Ставыс, мый меддона, ас дінын, татӧн.

Некутшӧм мытшӧдъяс туйвизь оз торкны!
Сьӧлӧмӧй восьса мен урчитӧм мортлы.
Бӧръя йи торйыс нин вӧляысь сылӧ.
Азыма апала чӧскаммӧм сынӧд!

Лэбамӧй! Шонділань! Шӧвктугъяс менам,
Ӧтлаын быдсяма сьӧкыдлун венам!
Радейта! Лов пытшкӧ дзебӧмӧн, видза!
Енмыслы копыр, мый олӧмӧй мича!