* * *

Зэр... Бара писькӧдчӧ зэр —
Енэжса ва. Нинӧм лёкыс.
Зэр улын окота зэв
Ветлӧдлыштны кӧмтӧм кокӧн.
Велалім дзебсьыны век,
Овлӧ, мый ывласӧ нерам.
Эновті ме керка вевт.
Майбырӧй! Мед на и зэрӧ!
Котӧрӧн букыштчӧм йӧз
Зэр улысь пышйӧны гортас.
Налы — мед енэж век лӧз.
Налы — мед шонді пыр шонтіс.
Вывланьӧ кыпӧда юр —
Шылялӧ тшын рӧма кымӧр...
Быд ногыс поводдя бур,
Сы водзын ыдждавны нинӧм!
Зэр мыськӧ му вылысь бус,
Пожъялӧ пуяслысь коръяс.
Зэрыслӧн муслун оз кус
Чужтыны ичӧтик шоръяс.
Сьӧлӧмӧдз войт бӧрся войт
Вӧр-валӧн мичлуныс йиджӧ.
Некор на вӧвлытӧм мойд
Поводдя миянлы гижӧ...