БИПУР

Уль резюв чискис, эз кӧсйы ӧзйыны. Гӧрӧда кабыр нюжӧдчис бипурлань, чӧвтіс сюмӧд турушка. Посньыдик увъяс саялісны тшын пиӧ, косьмыштісны, да битор быттьӧ яндысьӧмӧн дзигӧдіс найӧс. Недыр мысти сьӧд тшын лӧзӧдіс, резюв шыбитіс би кывъяс да трачкӧмӧн кутіс ломтысьны.

Сой кыза ув вылын друг кыськӧ мыччысис кодзувкот. Гӧрд. Ыджыд. Сійӧ ружтӧмӧн кыскис мыш вылас руд пожӧм лыс. Ув помын кодзувкотлысь туйсӧ потшис би. Кодзувкот вӧрӧдыштіс усъяснас, бергӧдлыштіс юрнас. Сэсся котӧртіс ув мӧдар помӧ. Но сэн би ыпъяліс да нюліс нин увсӧ гӧгӧрбок.

Кодзувкот шыбитчывліс ӧтарӧ и мӧдарӧ, но гӧгӧр ыргис би. Кодзувкотлы бергавны колис сӧмын весьт кузя ин. Кытшъяс сылӧн чинісны и чинісны. Би саридз босьтіс кок увсьыс діторсӧ. Кодзувкот чӧвтіс мыш вывсьыс руд пожӧм лыссӧ да заводитіс бергавны дурпоп моз.

Пожӧм лыс чишнитіс, сылӧн биторйыс воис кодзувкотӧдз. Кодзувкот ёкмыльтчис, пӧрис ыпъялысь ув вылӧ да сьӧдӧдіс.

Ён дядьӧлӧн лолыс тырис бипур пӧльтігӧн. Пуксис. Перйис зепсьыс «Астра». Нюжӧдчис билань. Кыскис сэтысь ыпъялысь ув. Пӧльыштіс ув вылысь кодзувкот шой да пестіс чигаркасӧ.

Добра мудз мортлы бипурыд.