ЖОВПУ — ЙӦЗӦС БУРДӦДЫСЬ

Матыстчӧ тӧв. Муяс да видзьяс вевттьысисны нин еджыд шебрасӧн. Выль пӧлӧс паськӧмӧн шебрасисны и туйяс да керка вевтъяс. Войяснас трачкӧдчӧ кӧдзыд, корсьӧ, мый позьӧ кынтыны, топӧдны. Тыяс да куръяяс кӧдзыдыс вевттис вӧсньыдик кеньӧн.

Коръя пуяс важӧн шыбитісны ас вывсьыныс мичлунсӧ, сулалӧны пасьтӧмӧсь, тіралӧны тӧвлӧн быд пӧльыштӧмысь.

Оз нин тыдавны пелысь пуяс вылын гӧрд вотӧсъяс, найӧс важӧн кокалісны лэбачьяс. Но арся мичлуныс эз на быдлаын быр. Со керка бокас, град йӧрын, сулалӧ некымын жовпу, вӧччӧмаӧсь быттьӧ праздник вылӧ. Пулӧн быд вожйын ӧшалӧны чим гӧрд розъяс. Вотӧсъясыс гырысьӧсь, ылӧдз тыдалӧны, вежтӧ петкӧдлӧны.

Жов — абу прӧстӧй пу. Сійӧ йӧзӧс лечитысь быдмӧг. Кӧть сылӧн вотӧсъясыс курыдӧсь, а уна пӧлӧс висьӧмъясысь отсалӧны гырысь йӧзлы и челядьлы.

Тайӧ пуыс отсалӧ налы, кодъяслӧн тшӧкыда висьӧ сьӧлӧмыс, гырк пытшкӧсыс, юрыс, кокньӧдӧ кызӧдӧмысь мучитчысь йӧзлы, бурдӧдӧ нёльзьӧм висьӧмъяс, пежасьӧм ранаяс, зӧлӧтука да уна мукӧд висьӧмъяс.

И витаминъясӧн сійӧ зэв озыр. Коми йӧз важӧн тӧдӧны тайӧ пуыслысь коланлунсӧ да мичлунсӧ, оз чегъявны, оз керавны сійӧс.

Тулысӧдз вермасны ӧшавны жовпу вылын гӧрд шаръясӧн ӧзйысь розъясыс. Тулыснас, пелысь да льӧм дзоридзалӧм бӧрын, восьтас ассьыс мичлунсӧ и жов.

Гожӧмнас сійӧ оз ёна шыбитчы синмад. Быдмӧ, сӧвмӧ, медым ассьыс став мичлунсӧ петкӧдлыны йӧзлы арнас либӧ тӧвнас.

Татшӧм тайӧ пуыс.