ЗАРНИ ГӦЛӦСА КОЛИП Серафим ПоповлыНебыд тӧвруӧн ӧвтыштӧ парма, Колип воӧмлы сьӧлӧмӧй рад. Ылі мусянь ӧд локтіс со бара Зарни гӧлӧсӧн гажӧдны сад. Сизим рӧма выль сьыланкыв кисьтӧ Кыддза расъясын пом ни дор. Сылӧн музыка сьӧлӧмӧ письтӧ, Сетӧ кывбурлы вынаджык борд. Сэсся гӧлӧсыс сёрӧнджык бердлӧ, — Колӧ ӧкмӧдны колиплысь рӧд, Чужӧм кагасӧ юктавны-вердны, Кытчӧдз лэбавны ачыс оз мӧд. Гожӧм помланьӧ эновтӧ расъяс, Весиг прӧщайтчан гӧлӧс он кыв: Вомас быттьӧкӧ босьтӧма васӧ Парма ёльысь — и некыдз оз сьыв. Гашкӧ, шогысла чӧв олӧ сэки, — Сыкӧд бара ог аддзысьлӧй дыр. Мыла гӧлӧса колипӧй, эскы: Тэнӧ парманым примитас пыр.
