ВӦТЫД ПӦРЪЯЛІС
Лӧсьыд вӧт аддзыліс войнас Тимофей. Эз чайтлы, мый татшӧм бур вӧтъяс вермӧны лоны.
Сёр рытӧдз пукаліс телевизор дорын, видзӧдіс «Чапаев» кинокартина. Кымыныськӧ чеччыштліс улӧс вывсьыс, кор Василий Иванович аслас смел варышъяскӧд вӧтчис белогвардеецъяс бӧрся. Важӧн нин помасис кино, а зонка пыр на пукаліс телевизорлы паныдӧн да виччысис, оз-ӧ картинасӧ петкӧдлыны мӧдысь. Бать-мамыс эз вӧвны гортас: совхозын соборуйтісны.
— Сима другӧй, тӧдӧмысь, эз и аддзыв киносӧ: та каднас пыр урокъяс вӧчӧ. Висьтала сыла аски, завидьысла потас.
Сэки дум вылас уси, мый аслас урокъясыс вӧчтӧмӧсь на, шогӧдіс быдсӧн. Юалас кӧ аски Дарья Семёновна, Тимофей бара двойка нажӧвитас.
Пуксьыліс книгаяс сайӧ, а синмыс куньсьӧ, букваяссӧ весиг оз аддзы. Ковмис водны. «Аски водзджык чечча да удита на вӧчӧдны», — такӧдіс сійӧ асьсӧ.
Войнас Тимофей аддзис татшӧм вӧт. Быттьӧ локтіс школаӧ медся водз. Еджыд дӧрӧма, выль гача, юрсисӧ весиг сыналӧма. Заводитчис урок. Учительница Дарья Семёновна здоровайтчис челядькӧд, пуксис аслас местаӧ.
— Урокъястӧ ставныд вӧчинныд?
— Вӧчим, вӧчим, — кылісны гӧлӧсъяс.
— Кутшӧм задание сетлі тӧрыт тіянлы? Та йылысь миянлы висьталас Тимофей Рубцов.
Тимофей чеччис, мӧдіс висьтавны. Классын вӧлі сэтшӧм чӧв — кызӧктыны весиг некод оз лысьт. А Тимофей висьталіс и висьталіс. Медбӧрын сійӧс дугӧдіс учительница, ошкыштіс да дневникас пасйис «пять».
Тимофейяс ставӧн мӧдісны кутлыны. Локтіс гортас да порог дорсяньыс на мӧдіс ошйысьны мамыслы.
— Ура! Талун ме «пятёрка» вайи, — горзӧ, а гӧлӧсыс оз кыв. Тайӧ горзӧм шыас и садьмис. Оз гӧгӧрво, збыль тайӧ ставыс вӧлі али эз. Весиг портфельсьыс дневниксӧ перйыліс. Но сэні некутшӧм «пятёрка» эз вӧв.
«Татшӧм бур вӧт кӧ аддзылі, сідзкӧ, Дарья Семёновна и збыльысь «отлично» пуктас. Ӧпрӧсь пӧч тай висьталӧ: вӧтыд пӧ пыр инӧ. Сідзкӧ, ог и кут вӧчны урокъясӧс. Ывлаыс со пемыд на. Узьышта кӧ, бурджык лоӧ», — мӧвпыштіс сійӧ.
Тимофей школаӧ мунтӧдз пасьталіс еджыд дӧрӧм, выль гач, голяӧ кӧрталіс гӧрд галстук, юрсӧ шыльӧдіс. Вӧчис ставсӧ сідзи, кыдзи асьсӧ аддзыліс вӧтын. Весиг мамыс шензьыштіс.
Школаӧ пыригӧн нин суӧдіс ассьыс другсӧ.
— Сима, тӧрыт видзӧдін «Чапаев» киносӧ?
— Видзӧдтӧг эг ов.
— Уроктӧ эн жӧ вӧч?
— Вӧчи.
— А ме эг эшты.
Классын лои буретш вӧтын моз жӧ. Тимофей тэрмасьтӧг чеччис, видзӧдліс ёртъяс вылас, сэсся мӧдіс висьтавны:
— Коми муын олӧны уна пӧткаяс: рака, катша, чипан да петук, ещӧ пышкай.
Челядь ставӧн серӧктісны, Тимофей шӧйӧвоши.
— Но, а кутшӧм зверъяс да пӧткаяс олӧны миян вӧр-ваын? — юаліс учительница.
Тимофейлӧн ставыс вуні. Но сэсся путьмис шуны:
— Утка, дзодзӧг, юсь...
Сима шӧпнитіс другыслы:
— Тури кокнас шорсӧ лойӧ,
Абу муса сылы ар...
— Пӧлинӧ, тури ещӧ олӧ, кузь кока тури.
— Бара, тыдалӧ, книгатӧ абу восьтылӧмыд, — дивитіс сійӧс Дарья Семёновна. — Пуксьы, «двойка».
Тимофей вылӧ быттьӧ кӧдзыд ва кисьтісны. Со и надейтчы вӧтыд вылӧ.
