ВОТЧИГӦН


Дзусянь дзуӧ котралігӧн
Вошті петан туйӧс.
Повзьӧм сьӧлӧм воис пикӧ,
Веськодь лои пувйыс.

Кыла: кизьӧрмыштӧ кынӧм,
Вӧрыс помтӧм-дортӧм.
Шонді пыдди — зэра кымӧр,
Некӧн абу ордым.

Кокӧй лои ӧдйӧ вӧрысь:
Котӧрӧн моз муна.
Мышкын пестер, нӧшта сьӧрысь
Тыра чуман нуа.

Сэсся, бергӧдча да бара
Кодарӧкӧ сетча.
Менӧ тшак-вотӧса арыс
Кыйис аслас лэчкӧ.

Туйыс абу тан ни сэні,
Бесыс ӧмӧй каттис?
Шуштӧмлуныс босьтӧ пленӧ,
Рытъядор нин кадыс.

Сӧмын вӧрлӧн шувгӧм кылӧ,
Дзуртӧ тӧщӧ конда...
Час-мӧд мысти вӧр-пу йылӧ,
Слабог, петіс шонді.

Веськыд пельпом вылӧ сэки
Шондісӧ ме пукті,
Кодӧс мир туйланьӧ петіг
Окалі да кутлі.