ВӦТ


Тӧрыт войбыд ме воюйті вӧтӧн:
Ёртъяс усисны, коли ме ӧткӧн.
Шойяс пӧвстӧдыс ӧтарӧ кысся,
И сэк бать менам кыпӧдчис кыськӧ.

Тӧр пилоткасӧ нямралӧ киас,
Шуӧ: «Му вылас ов, муса пиӧ.
Пельпом вылын на менам со юрӧй,
Лазйын черӧй со, пуртӧсын пуртӧй.

Локті дорйыны тэнӧ пеж лолысь.
Вайи вежа ва сиктдорса ёльысь,
Юктав ёртъястӧ — ловзясны найӧ,
Сьӧлӧм шоныдтӧ налы тшӧтш пайды.

Эн коль ёртъястӧ бой поле вылӧ,
Кынмӧм вир-яйныс, виччысьлы, сылӧ.
Пӧльышт быдӧнлы пӧсь ловтӧ вомсьыд,
Кусӧм сэрапом битӧг оз ломзьы».

Плавкӧс флягасӧ мыччӧ мен кисьыс,
Шуа: «Аслад нин лысьӧмыд сісьмис.
Али ловзьӧдіс нимкыла ваыс?
Али Енмыс нӧ татчӧсӧ вайис?..»

Орис батьӧкӧд сёрнитан вӧтӧй:
Бокӧ кияснас тувкнитіс гӧтыр.
Садьми — сырмӧдӧ аддзылӧмторсьыс,
Сьӧлӧм тіпкӧмӧй весигтӧ торксис.

Сетчи ӧшиньлань — лӧньышті вӧлись,
Ылын ӧшаліс быгалӧм тӧлысь —
Быттьӧ батьӧйлӧн пыжвывса лотӧк,
Быттьӧ усьӧм салдатлӧн пилотка.