ВӦРКАНЬ ДА КӦЧ

Вӧркань зэв ёна мунӧ гортса кань вылӧ, сомын ыджданас да дженьыд бӧжнас торъялӧ сыысь. Вӧрканьлӧн сьӧктаыс пудйысь унджык лоӧ, а тушаыс метрысь кузьджык, сувтса пеля, синъясыс ыджыдӧсь, кокъясыс ёнӧсь да кузьӧсь, чужӧм бокас бакенбардъяс ӧшалӧны, гӧныс небыдик.

Войся звер ёнджыкасӧ олӧ ылі вӧръясын. Восьлалӧ сійӧ гортса кань моз небыда, куталӧ кӧчьясӧс, шыръясӧс, йӧра пиянӧс, дозмӧръясӧс, таръясӧс, сьӧлаясӧс да быд сикас лэбачьясӧс.

Ӧти татшӧм звер уна во оліс-выліс Кузьёль бокын, медся лёк местаас, кытчӧ шоча волывлӧны вӧралысьяс. Войяснас кыйсис, луннас узис кутшӧмкӧ пӧрӧм пу бокын. Шойччан местасӧ пыр вежлаліс.

Ӧтчыд вӧркань казяліс, мый йӧра да сылӧн ичӧтик пиыс лэччылісны юны Кузьёль дорӧ. Вӧрканьлӧн ӧзйисны синъясыс, дульваыс кутіс петны, сэтшӧм окота вӧлі чӧсмасьны йӧра пиӧн.

Кайис сук коз вылӧ, код дінӧ веськӧдчисны йӧра эня-пиа, пондіс кыйӧдчыны. Звер топӧдчис коз лапъяс костӧ, паськӧдіс лэчыд гыжъяссӧ, синъяссӧ эз вештыв йӧраясӧн талялӧм туй вылысь.

Йӧра мам муніс водзас, пиыс — бӧрсяньыс. Кор воисны сук коз пу весьтӧ, вӧркань ӧдйӧ кыпӧдчис места вывсьыс и здукӧн чеччыштіс йӧра пи вылӧ. Сӧмын тай, кыдзи кӧсйис, эз артмы. Лэчыд гыжъяс улас эз сюр сійӧ, кодӧс кӧсйис джагӧдны. Сы пыдди йӧра мам удитіс бӧр кокнас зятнитны вӧрканьлы пиняс. Тайӧ лои сэтшӧм виччысьтӧг, мый лёк зверлӧн вель дыр кежлӧ пемдыліс синмыс. Кык пинь чеги йӧра чужйӧмысь, а вомсьыс ылькнитіс вир.

Куим лун куйліс вӧрса звер пӧрӧм пуяс дорын, сёйны ни юны эз вермы.

Нёльӧд луннас бара на петіс кыйсьыны. Сёйтӧгыд регыд кыстӧ нюжӧдан, а вӧлӧгаыд ачыс вомад оз лок, колӧ корсьны. Сӧмын мед йӧраыд оз паныдась: сыысь ӧні ачыс нин поліс!