* * *

Тшыгъявлін и кынмавлін кӧть коркӧ,
Дырнад гӧлӧс тэнад овліс нор кӧть,
Рӧдинаӧй — дона, мича Аньӧй,
Враг водзын эн сувтлы пидзӧсчаньӧн.

Ыззьылісны сотны война биын —
Дорйисны сэк олӧмнас ныв-пиян.
Босьтчыліс код вины тэнӧ мечӧн,
Сійӧ на и чегліс ассьыс вечик.

Некор мед эз потлась енэжтасыс,
Нюмъялігтыр локтіс мед быд асыв,
Киас мечӧн изйысь сувтіс мамным
Легендарнӧй Малахов курганын.

Рӧдина — тэ мамлӧн чужӧмбаныс,
Видзӧднысӧ карта кодь код ставнас:
Визйӧдлӧны сійӧс визув юяс,
Чужан муӧн вуджӧм сьӧкыд туйяс.

Рӧдинаӧй — Эжва дорса кыддзӧй —
Сьӧлӧмсяньым радейтӧмысь кындзи
Ставсӧ шӧри юкас тэкӧд лолӧй,
Ковмас кӧ — ог жалит ассьым олӧм.

Рӧдинаӧй менам уна рӧма:
Кӧнкӧ — шоныд, кӧнкӧ — пими кӧма...
Рӧдинаӧй, паськӧд вына сывборд,
Бордъяв тшӧтш и парма пилысь кывбур.

Тшыгъявлін и кынмавлін кӧть коркӧ,
Дырнад гӧлӧс овліс тэнад нор кӧть,
Рӧдинаӧй — дона, мича Аньӧй,
Враг водзын он сувт тэ пидзӧсчаньӧн.