СЁРНИТӦ ТУЛЫС

Бушколаліс тӧв и сэсся ланьтіс,
Вуніс лымйӧн ыршасяна сер.
Кыдзьяслӧн нюдз роскын — бриллиантъяс,
Сэтчӧ найӧс ӧшйӧдлӧма зэр — 
Первой зэр.

Лэбовтӧны кымӧръяс юр весьтті,
Вӧтӧдӧны ылыс, тӧдтӧм край.
На бӧр вывті енэж надзӧн сэзьдӧ,
Шондіасьӧ му, сэн югдӧ май.
Долыд май.

Ловзьӧны совхознӧй паськыд ыбъяс,
И ми тэкӧд ӧтлаынӧсь сэн.
Быдӧн эскӧ: «Налӧн нянь тан лыбас, — 
Некод налысь водзмӧстчӧм оз вен.
Оз, оз вен!»

Топыда ме кутла тэнсьыд китӧ, — 
Некодыр оз вошты сійӧ сям.
Уджын сійӧ вермӧмъяскӧд йитӧ,
Сідзкӧ, шудным некодыр оз ям.
Оз, оз ям!

Уджӧ, дона ёрт! Ми кад ог воштӧй,
Дона сылӧн тулысын быд здук.
Коді сійӧс донъялӧ, сэк ошкӧ
Сійӧс ыджыд урожайӧн му.
Кӧдза му.

Бушколаліс тӧв и сэсся ланьтіс,
Вуніс лымйӧн ыршасяна сер.
Кыдзьяслӧн нюдз роскын — бриллиантъяс.
Сэтчӧ найӧс ӧшйӧдлӧма зэр.
Нимкодь зэр.