СУЛАЛӦ МЫР...

Парматі нюжӧдчӧма веськыд да кузь ордым. Сэті восьлалігӧн паныдасьлӧны кос нюръяс, кӧні быдмӧ чӧд и чӧдлач, пув и турипув. Козъя вӧръяс пӧлӧн мунігӧн син улад усьлӧны гӧрд да сім гобъяс, путникъяс и ягсеръяс.

Буретш вӧлі сентябр пом. Асывнас кар весьтӧд шлывгысь кымӧръяс резӧбтісны-койисны зэр, мыськалісны асфальтӧн вевттьӧм уличаяс, москияс, мыськисны керка вевтъяс, вижӧдӧм пуяс, кодъяслӧн пӧшти дзикӧдз гылалӧма корйыс.

Зэр сэтшӧм жӧ ӧдйӧ помасис, кыдзи и заводитчис. Вочасӧн разалісны кымӧръяс, и пыдӧстӧм енэжсянь мӧдіс мыччасьны быдӧнлы колана да муса шонді.

Вотчыны мунысьтӧ зэрыд оз повзьӧд. Кыдзи и быд асыв, Вылыс Човйӧ мунысь автобусын пукалісны вотчысьяс и вӧралысьяс, томъяс и олӧмаяс, мужичӧйяс и нывбабаяс.

Татшӧм кадад и мен оз пукавсьы гортын. Час-мӧд мысти ме восьлалі нин тӧдса ордым кузя. Мунышта неуна, сувтыштла, медым варовитыштны чипсан отсӧгӧн сьӧлаяскӧд, кодъясӧс вель тшӧкыда аддзывла татчӧс вӧръясысь.

Эг на удит вуджны джын туйсӧ, пукси шойччыны. Юышті чай, кодӧс пыр вӧдита термосын. Луныс лӧнь да шоныд, некытчӧ тэрмасьны. И сэки син улӧ уси улӧс судта важ мыр, вит-квайт воськов сайын, дзик ордым бокас. Мыр вылыс ставнас вевттьысьӧма еджыд нитшкӧн. Шонді югӧръясыс да тӧлыс нитшсӧ кудритӧмаӧсь. Мыр вылас быттьӧ оз нитш быдмы, а кутшӧмкӧ вӧрса кӧзяйка вольсалӧма сэтчӧ пызан дӧра да виччысьӧ дона гӧсьтъясӧс.

Аслас мичлунӧн ещӧ на чуймӧдіс менӧ мырйыс, кор матыстчи сы дінӧ. Мыр вылас гӧгӧрыс еджыд нитш пӧвстын быдмисны польдчӧм пув розъяс. Праздничнӧй пызан артмӧма. Кӧсйи пувсӧ вотны, но тайӧс вӧчны киӧй эз лыб.

Унаӧн на ӧд аддзыласны мырлысь аслыссяма мичлунсӧ. Мед и найӧ тшӧтш нимкодясьыштасны.