СТРАДА КАД

Муяс вылӧ петісны тракторъяс. Совхозъясын уджалысьяслы воис страда кад. Колӧ регыдъя кадӧн гӧрны-кӧдзны, пуктыны картупель да градвыв пуктасъяс.

Ва воссьӧм бӧрын страда кад пуксяс и вӧр кылӧдысьяслы. Колӧ пуръявны да мӧдӧдны стройкаяс вылӧ уна тысяча кубометр вӧр. Запаньясын лун и вой оз дугдыв уджыс.

Асланыс страда кад эм и пӧткаяслӧн да лэбачьяслӧн. Водз тулыснас на найӧ заводитасны лӧсьӧдны позъяс. Вӧчӧны найӧс кос турунъясысь, нитшъясысь, ньӧръясысь, гӧнъясысь, тэчӧны сёйысь. Быдӧнлӧн асланыс мода.

Катшаяс, ракаяс, юрсикайяс, жоньяс, сьӧд ракаяс позсӧ вӧчӧны пуяс вылӧ.

Юсьяс, дзодзӧгъяс, уткаяс, истанъяс да ваын плавайтысь мукӧд пӧткаяс вӧчӧны быдтысянінсӧ юяс да тыяс дорӧ.

Дозмӧръяс, таръяс, сьӧлаяс, шоныд муысь локтысь мукӧд лэбачьяс позъялӧны вужля увъясӧ, пӧрӧм пуяс бокӧ.

Ёсь бордъя му джыджъяслысь позсӧ позьӧ аддзыны ю кыркӧтшъяс дорысь. Кодъясны лыа пытшкӧ ас тӧрмӧныс розь, овмӧдчасны сэтчӧ. Вель уна лэбачьяс позъялӧны и пу горсъясӧ, скворечникъясӧ, ӧшинь куричьяс костӧ, кер бунтъяс улӧ.

Кор позъяс лоӧны дасьӧсь, энь лэбачьяс, пӧткаяс ваясны сэтчӧ кольк, заводитасны пӧжны найӧс. А мыйкӧ дыра мысти сэтысь петасны посньыдик пиян. Найӧс колӧ вердны-юктавны, видзны кынмӧмысь, зверьясысь, катша-ракаясысь, кырнышъясысь, варышъясысь.

Абу ӧд этша врагыс лэбачьяслӧн.