САЛДАТЛЫ ПИСЬМӦ

Со и рыт нин. Пемыд.
Пужъялӧма туй выв.
Но ме аддза сэтысь
Кок туй тэнсьыд, пӧсь.
Кыптӧ югыд тӧлысь,
Пукала ме ӧтнам,
Морӧс пытшкын олан — 
Ыджыд-ыджыд гӧсть.

Исковтасны лунъяс,
Ветлас тӧвлӧн гӧлик,
Чышкас тэнсьыд кок туй
Уджаліг тӧвбыд.
Сылас лым апрельын,
Вешъяс шоглӧн челик:
Шӧпнитас победа
Югыд майскӧй рыт.

Дзоридзьясӧн вӧччас
Июньын тувсов ывла.
Вылын зарни шонді, — 
Сэтшӧм югыд свет!
Гӧгӧр сьылӧ миян
Шуда ыджыд муным,
Копыртчӧ поклонӧн
Тэн быд ловъя чвет.

Туй вылӧ ме пета,
Янсалім ми кытӧн,
Сэтысь аддза тэнсьыд
Тэрыб да збой вӧв.
Поводӧдыс кута, — 
Кутчысьлам ми тэкӧд — 
Шыгыр улад сылас
Шоглӧн кӧдзыд тӧв!