ПРОКӦ ИВАН

Кӧть мед кутшӧм, но ас крайыд
Медся муса.
Ыджыд радейтӧмсӧ тайӧс
Морт оз кусӧд!
Прокӧ Иван дӧзмис ёна Коми муын овны: Ӧкмыс тӧлысь ружтӧ кӧдзыд, И век лоӧ повны. Вот Кубаньын... Олӧм сэні — Пес ни пу оз ковмы. Му выв рай пӧ воссяс сэні, Тӧждтӧг кутас овны. Колис ассьыс чужан места Миян Прокӧ Ваня, Олӧ, ыджыд каллян пестӧ, Олӧ жар Кубаньын. Сёйӧ яблӧг, сёйӧ дыня — Ставсӧ, мый нин колӧ. Азов дорын чери тӧня, — Тані дзик мӧд олӧм! Лунын уджалӧ совхозын, Рытнас — гортыс гӧгӧр. Уджлӧн озыр сылы козин: Амбар — няньӧн пӧдӧ. Мый нӧ сэсся сылы колӧ? Кокбӧрлясӧ нывъяс Медым гыжъялісны сылысь, Сьыліг сьыланкывъяс? Натӧг лӧсьыда зэв овсьӧ Азов море дорын. Енэжын жар шонді ворсӧ, Быдсӧн синтӧ ёрӧ. Воас рыт — оз жугыльт сьӧлӧм: Сылы степын сьылӧ Радио, и степъяс пӧлӧн Мича сьылӧм кылӧ. — Воссис жӧ, старука, олӧм! Вӧт, а абу вемӧс, — Шуӧ пӧчыслы. — Ог полӧй Пӧттӧмысь, кыдз нэмӧс Миян Коми чужан муын. Сэні пыр ми дзуртім. Ӧні веськыда ме шуа: Вӧлі сэк ме юртӧм... — Ваня висьталӧ. Друг сэки Коми сьылан кылӧ. Сійӧ юклӧдлӧ став степ выв, Лэбӧ ылӧ-ылӧ. Ваня синъяс водзӧ югдӧ Аслас вӧрыс, ваыс, Емва йылысь гажа Вукдін, Туйяс Вӧрыкваысь; Кыдзи эськӧ выя комсӧ Ӧні сёйис сэтысь! Сӧмын ӧні ставыс помсьӧм: Комсӧ кыйны некысь. Казьтӧ томдыр, выйдӧм тойӧм, Нывъяскӧд рыт пукӧм, Воӧ тӧд вылас том чойыс, Гортыс тайӧ здукӧ. Ваньлӧн гудыртчӧ став сьӧлӧм, Мыйкӧ сэні вӧрзьӧ. Сідзкӧ, гортыс муса вӧлӧм, — Ваньӧ тшук оз бӧрддзы. «А ӧд збыльысь, мый тан бурыс, Шондіа Кубаняс? Гортӧс коли аслам дурысь, — Мӧвпалӧ друг Ваня. — Пета степӧ — пу ни палич, Кыксё верст кӧть видзӧд. Кӧдзыд ывла тан оз калит, — Могыс миӧдз ичӧт. Тан веж лыска вӧр оз шувгы, Матын — ю ни гӧра, Мусӧ пыркӧдіг оз увгы Кось, оз ветлы йӧра. Тась он аддзы тар ни чукчи, Найӧ тан оз койны. Еджыд байдӧг лым оз пуркнит, Ваньлӧн сьӧлӧм доймӧ. — Ме ог омӧльт татчӧс ывла, Лунвыв муын олӧм. Но кӧн чужлі, сэн и кула, Сэн и петас лолӧй!» Пуксис поездӧ и журкйӧ, Журкйӧ Коми муӧ. Ыджыд шудӧн сійӧ чукъя, Помтӧм радлун пуӧ. — Ылӧдз? — юалӧны сылысь. — Ылӧдз. Войвыв помас, Кӧні сьыланкыв ми йылысь Некодыр оз помась. Сэтчӧ, кӧні еджыд лымсӧ Кокнас байдӧг гӧрӧ; Сэтчӧ, кӧні сьӧла-тарсӧ Вӧр-ваыс оз тӧрӧд!
Гижӧд
Прокӧ Иван
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1