ПОЖЪЯСЬЫСЬ НЫВ


Алӧй бан бока, лӧнь ывла выв,
Ӧвтӧ веж лудыс маӧн да йӧлӧн.
Кӧмтӧг тапиктӧ вадорӧ ныв,
Тазйын лэччӧдӧ пожъявны кӧлуй.

Кокни чышъянӧн тупкӧма юр,
Муыс кок улас туруна, шоныд.
Быгъя вом дора жарысла ю,
Жарӧн лолалӧ асывсянь шонді.

Пӧрччис ас вывсьыс платтьӧсӧ ныв,
Быттьӧ васаыс син водзӧ сувтіс —
Еджыд юрсиа выль сьыланкыв,
Орӧм коскӧдыс кинад кӧть кутлы.

Сотчӧ вир-яяс томлунлӧн би.
Медся шань зонмыс мед эськӧ ваяс!
Лэбач бордъяс моз шевкнитліс ки,
Сэсся чери моз гыбаліс ваас.

Ньывкӧс береглань сибӧдчис бӧр,
Дзугсьӧм юрсиыс вевттьӧма морӧс.
Нывлӧн мичлуныс синмӧ оз тӧр,
Нывлӧн сьӧлӧмын гожӧмыс ворсӧ.

Менам сьӧлӧмын ыпмуніс дой:
Кӧнкӧ тан аслам медводдза муслун,
Коді паметьын олӧ кыдз мойд,
Коді ӧніӧдз эз вермы кусны.

Нывлань дзоръялі-видзӧді дыр,
Ассьым том кадӧс синъясӧн корси...
Еджыд кымӧрӧн енэжыс тыр,
Мыськӧм дӧрӧм-гач быттьӧ сэн косьмӧ.