ПАШЛЯК


Пашляк печласигтыр локтӧ.
Вермас кынтыны ки-коктӧ.
Со тай, лыйсьӧ трач да шков,
Быть ӧд сэсся сыысь пов.
Ывла вылӧ петіс Вася,
Шоныд гача, ыж ку пася.
Вурун кепысь, кролик шапка,
Валегиӧн ӧдва шлапкӧ.
Муртса Васьлӧн кынмис нырыс,
Ӧдйӧ гортас сійӧ пырис.
Даньӧ Пашлякысь оз пов,
Сійӧ паччӧрын оз ов.
Талун Даньӧ урок бӧрын
Пессӧ поткӧдлӧ горт йӧрын.
Шоныд дӧрӧм зонка вылын.
Пасьыс бокын куйлӧ сылӧн.
Пашляк пыр жӧ аддзис тайӧс,
Мышку вылас зонлы кайис.
Кӧсйис кынтыны, но весь,
Ковмис бӧр лэччыны сэсь.
Сэсся пась пытшкӧсӧ пырис,
Эзысь гыӧр лои тырыс.
Кодыр Даньӧ босьтіс пасьсӧ,
Пыркнитіс сэсь сійӧс асьсӧ.
Пышйис Пашляк сэтысь ылӧ,
Бара кӧнкӧ трачкӧ-кылӧ.