* * *

Пармаыс пожӧм кырсь рӧма,
Чӧскыда сир дукӧн ӧвтӧ.
Сизь, кылӧ, сизьдӧ поэма,
Думысь ме кывбуръяс лӧвта.

Ышмӧдӧ вӧр-ваыс ловтӧ,
Сьӧлӧмыд кокниа йӧктӧ.
Чӧдйыскӧд ӧтлаӧ вота —
Лысвасӧ чуманӧ ӧкта.

Кок дорын вильшасьӧ понйӧй,
Радысла леститчӧ, никсӧ.
Тӧвруыс тэрыб, оз конъясь,
Нигӧн кодь кымӧрсӧ нискӧ.

Югыдыс ойдӧдіс ягсӧ,
Вӧр-ваыс шызис да пузис,
Быттьӧкӧ шондіыс ачыс
Мыр вылӧ шойччыны пуксис.