* * *

Пармаын абу ме попӧ,
Чужлісны пӧль тані, пӧчӧ.
Ме водзын кыз кока гобыс
Ачыс гӧрд шапкасӧ пӧрччӧ.

Пельпомӧ лапкӧдны кужӧ
Енэжсӧ люкалысь пожӧм.
Сир дукӧн нӧгыльтӧм чужва
Вийӧдӧ яг шӧрас гожӧм.

Сир дуксьыс лоӧма кыйсьысь
Коз пу кодь винёв да сирӧд.
Пӧрысьӧдз оз юкав лысьӧм,
Ачыс кӧ вӧр-ваыс вирад.

Чуманӧн восьлала вӧрӧд,
Мый бара-й яг саяс эм-а?..
Мед эськӧ сьӧла и йӧра
Пармаын олісны нэмъяс.

Быттьӧкӧ ыджыд театрын —
Музыка яг пасьта кылӧ.
Тулысын, тӧлын и арын
Аслысног быд лэбач сьылӧ.

Зэвтчӧмны пуясыс костӧ
Сэн и тан черань вез-сіяс:
Быттьӧкӧ Нёбдінса Виттор
Зэвтӧма сигудӧк сияс.