ОЙ, ТӦЛЫСЬ, ТЭ, ТӦЛЫСЬ А. В. КызродевалыОй, тӧлысь, тэ тӧлысь! Тэ югыд и яр, И веськодь тэн, му вылас кӧдзыд, кӧть жар. А сэтӧні гымалӧ ыджыд война, И сотчӧ став муыс, и пузьӧма ва. Тэ дзирдалан вылын и шоглун он тӧд, А менам жӧ сьӧлӧм... Сэн серпас дзик мӧд. Та рытӧ, кор тэ бара кыпыда сэн Сідз кывтан да эзысьтӧ киськалан мен, Ӧд, гашкӧ нин, медся бур другӧй эз ло — Атакаын усис и гортас оз во. А мусаӧй, коді став гаж и став шог Пыр юкліс мен тӧждысьысь пӧткаяс ног, Сансумканас, гашкӧ, вир гӧптын и сэсь Оз вермы нин лэптысьны, пессьӧмыс весь. Бать-мам менам пӧрысьӧсь — юрсиныс дзор; Нэм сьӧкыда вуджӧм мысьт шойччыштны кор Тшук колыштӧ налы — оз аддзывны сутш — Пыр медбӧръя вынсьыныс мыркӧны удж, Мед пасьтӧдны армия, быдтыны нянь, Мед фронт вылын ставыслы вӧліс век шань. А налӧн ме вердысь и дзик ӧти пи Ён тыш вылын тожӧ, кӧн быдлаын би, Кӧн ставсӧ дзик ньылалан адыслӧн ӧд Сідз гурзьӧма!... Аски мый лоӧ, ог тӧд. Ой, тӧлысь, тэ тӧлысь! Тэ югыд и яр, Но веськодь тэн, му вылас кӧдзыд, кӧть жар.
