ӦТИ И МЕДБӦРЪЯ АДДЗЫСЬЛӦМФевральскӧй ыркыд лун. Лым чиръяс Тӧв йылын ворсӧны, а гӧгӧр — йӧз и йӧз. И ми, руд шынеляяс, Котлас гиръям, Кӧть шӧйтӧмсьыс нин важӧн босьтіс дӧз. Но нем он вӧч, кор мунны миян поезд Оз тэрмась некыдз, — сылӧн аслас лад. А шпалъяс вомӧн сытӧг тэ он войӧд, И пукав, тэныд рад, кӧть абу рад! И пукалам. Ме шынеляяс вылӧ, Тшын шпуткиг, дзорга: оз-ӧ веськав морт, Мед босьтны сійӧс аслам перӧ йылӧ, Поэмалысь мед шевкнитӧдны борд. — Герой тэн колӧ? — ваксьӧ Коля Сырцев. — Корсь, корсь! — тшӧтш содтӧ Веча Соловьев. — Поэма гижан, гонорартӧ пыр жӧ Ми юам ӧтвыв. Вот кор сьылас лов! — Дыр шутитім да сералім ми сэні, Кор сюрӧ, костас, табак шпуткигсор. И друг сэк Веча бокӧ чуткӧ меным: — Тэ видзӧдлы жӧ, видзӧд, локтӧ код! — И индӧ мен руд шынеля морт вылӧ, Код локтӧ гырысь воськовъясӧн. Ме Син паськӧді — морт локтӧ, син оз ылӧд. Но код пӧ сійӧ? Мун да тӧдмав тэ! А сійӧ локтіс. — Чолӧм! — видзаасис. — Тан ас войтыр? О, Сырцев!... — Николай!.. — Ме шензя: «Али луныс востымасьӧ? Оплеснин! Сідзкӧ, эм на шудлӧн пай!» Ӧд сӧмын на газетъясысь ми лыддим Указ. Сэн вӧлі Николайлысь ним Геройӧ гижӧма, — он нимсӧ тайӧс мырддьы! И сылӧн мичыс нэмъяс чӧж оз сім. Оплеснинӧс эг тӧдлыв водз, кӧть олім Ми ӧти карын. И, дерт, чайті ме Орёлӧн сійӧс. Весиг муртса полі. А сійӧ — прӧстӧй, сералӧ: «Хе, хе!» И мун да сэсся корсь тэ сёрни серти, Код подлӧй трус, а коді сэн — герой! Сэн ӧти ошйысяс: «Оз повзьӧд чӧртыс!» А делӧ вылӧ воас — лыздӧ сой. А тайӧ, сыктывкарса прӧстӧй зонмыс, Сульк йиа ваӧд уйис Волхов ю Дон пуля шер улын, эз аснас донъясь, Кор сылысь корис подвиг чужан му! Мый мында колӧ вын, мый мында вӧля, Мед венны смерть, эз шенышт медым борд! Оплеснин водзын смертьыс вӧліс дзоля, А ачыс — крежъясысь медыджыд, вына морт! Ми варовитім тшук, и сійӧ муніс, Мед Сыктывкарысь аддзӧдлыны мам. А ми... Ми каттим рытыв туйлысь сунис, Кӧн пушкаяслӧн укйӧм шы эз ям. Дзик ӧти тайӧ аддзысьлӧм и вӧліс, Но паметьысь оз некор сійӧ вун, — Дзик нэм кежлам мен прӧстӧй нюмыс колис; Кор казьта сійӧс, шондіасьӧ лун!
