НАЙӦ ГАЖӦДӦНЫ МОРЕЯС, ЮЯС
Мойвилас кӧ кодлыкӧ тіян пиысь кывтны судно вылын помтӧм-дортӧм мореті, дыр кутад казьтывны, кутшӧм ылӧдз колльӧдасны ӧдйӧ шлывгысь судносӧ каляяс. Шенасьӧны бордъяснаныс горзӧны, быттьӧ кӧсйӧны гажӧдны судно вылын мунысь войтырӧс, кодъясӧс кузь туй вуджигӧн вермасны дӧзмӧдны джуджыд да вынйӧра гыяс, руяс и штормъяс.
Оз кольччыны каляяс ӧдйӧ мунысь судноысь, вӧтчӧны сы бӧрся. То сунгысьласны гыяс костӧ, то качӧдчывласны вывлань. Видзӧдан на вылӧ да дивуйтчан, кытысь тайӧ лэбачьяслӧн эбӧсыс, тэрыблуныс. Важӧн нин оз тыдав некутшӧм берег, гӧгӧр сӧмын шыльквидзӧ морелӧн паськыд мышкыс, а еджыд каляяс пыр па абу мудзӧмаӧсь, лэбӧны, горзӧны, оз и чайтны бергӧдчыны береглань. Збойджык каляяс весиг пуксьылӧны шойччыштны судно вылӧ, гоннялӧны гӧгӧр, сэсся бӧр кыпӧдчӧны сынӧдӧ.
Кор каляяс эновтасны пыр ылыстчысь и ылыстчысь судноӧс, сьӧлӧм вылад быдсӧн гажтӧм лоӧ, быттьӧ мыйкӧ оз тырмы.
Кор ме шойччи Рижскӧй взморье вылын. Видзӧдлан вӧлі ӧшиньӧдыс асывнас, и син улам пыр и усьӧ лӧзалысь ва, ылӧдз нюжӧдчӧм лыа берег и, дерт жӧ, залив весьтӧд каляяслӧн лэбалӧмыс. Восьтан ӧшиньтӧ, и пельӧдзыд воасны налӧн тӧдса гӧлӧсъясыс. Кор шойччӧны, узьлӧны каляяс, сьӧкыд гӧгӧрвоны. Лун и вой быттьӧ бордъяс вылынӧсь, оз, тыдалӧ, и мудзлыны найӧ.
Кодкӧ кӧ шыбитас заливас нянь тор, каляяс здукӧн чукӧртчасны сэтчӧ, зычитны кутасны, мырддьысьны шыбитӧмторнас, корны нӧшта. Мукӧд дырйи пуксясны веськыда ва вылас да еджыд шапкаяс моз качайтчӧны сэні. Быд асыв лэбачьяс садьмӧдӧны асланыс нюжйӧдлана шыясӧн дыр узьысьясӧс, ӧдйӧджык корӧны локны купайтчыны либӧ гожъявны сӧстӧм да шоныд лыа вылын.
Каляяс! Каляяс! Кымын мортлы ті козьналад радлун! Кутшӧм уна йӧз нимкодясьӧны тіян мича мыгӧрнад, мичлуннад, тэрыблуннад!
Муртса на воссясны войвывса дыр узьысь юяс, а тіян пиысь унаӧн тэрмасянныд нин ылі шоныд муясысь, саридзьяс сайысь Печора, Эжва, Сыктыв да мукӧд юяс вылӧ, медым тані быдтыны ас кодьныд жӧ сюсь синъяса, тэрыб бордъяса каляпиянӧс.
Нимкодь миянлы, кӧдзыд муын олысьяслы, мый онӧ ӧтдортӧй войвывсӧ, асланыд гортӧ локтанныд, уна тысяча километр кузьта туй вуджанныд.
Теплоходъясӧн, мотора пыжъясӧн ветліг-мунігӧн вель тшӧкыда ми нимкодясям тіянӧн, каля чукӧр. Видзӧдам, кыдзи ті кужӧмӧн да тэрыба сунласянныд ваӧ, медым кутавны вугралысь чериясӧс, ӧктыны юяс вылысь быд сикас сёянторъяс, кодъясӧс шыблалӧны йӧзыс. Ӧта-мӧдныдкӧд рытъяснас пукаланныд юбердса ляпкыдик куръяясын, лыа берегъяс дорын. И ставыс тайӧ миянлы вайӧ аслыссяма радлун.
Уджач йӧз кодьӧсь ті, зільӧсь: кыйсянныд-выйсянныд, челядьтӧ быдтанныд, тшӧтш и миянлысь войвывнымӧс гажӧданныд. Таысь и аттьӧалана кывйыс, юрсянь бур копырыс тіянлы!
