* * *

Мыйта мичлуныс ойбыртӧм эрдас:
Содзнад гумлав да тэч сьӧлӧм бердад.
Лым кодь еджыдӧсь байдӧгъяс татӧн
Кылӧ мойдчӧны месянь зэв матын.

Гегдӧм пуяслӧн муӧдз дзор тошъяс.
А лым толаяс — быттьӧкӧ ошъяс,
Кодъяс воӧмны вой саридз дорсянь
Татчӧ аслыныс сайӧдін корсьны.

Петлас турӧб да шыльӧдлас гӧгӧр.
Сотлӧ чужӧмтӧ тӧлыс, кыдз ӧгыр.
Кыа рӧмаӧсь уркайяс татӧн
Джуджыд коз йылын тивгӧны матын.

Долыд сьӧлӧмӧн ветлӧдла вӧрӧд,
Сьӧрысь сӧмын кӧть эм истӧг кӧрӧб.
Кыдз ог нимкодясь? Меным тшӧтш вичмис
Войвыв мунымлӧн чусмывтӧм мичыс.

Чужан вӧр-ваӧс радейтысь мортлӧн
Некор турӧбӧн оз тырлы ордым.
Менам сьӧлӧмлы мусмин тэ важӧн,
Ловъя пармаӧй — ваймывтӧм гажӧй.