* * *

Мыйкӧ талун ӧшинь сайын абу чӧв:
Проводъясын, оз и ланьтлыв, сьылӧ тӧв.

Гашкӧ, сійӧ кымӧр вайӧ, кӧдзыд зэр,
Медым бӧрдіс тувсов ывлаыслӧн эрд?

Гашкӧ, сывъяс — еджыд бушков, коръя лым?
Гашкӧ, пессьӧ, медым вайны чорыд гым?

Гым кӧ ваяс, шонтас ывла, потас кор — 
Ставыс сэки кутас сьывны, он ло нор.

Лым кӧ... Мый нӧ? Ог жӧ полӧй: тувсов лым
Урожайлы озыр подув. Сетас вын.

Нюклясьӧны джуджыд козъяс, кыдз и бадь, — 
Вильышмӧма талун ывла — абу садь.