ЛЭБӦНЫ ТУРИЯС

Быттьӧ дзик на неважӧн воисны войвылӧ ыджыд да мича лэбачьяс — турияс, а со найӧ бӧр нин шлывгӧны-лэбӧны шоныд муясӧ.

Видзӧдан турияслысь тэрмасьтӧг лэбӧмсӧ, вына да паськыд бордъяснас сынӧд поткӧдӧмсӧ, кывзан, кыдзи прӧщайтчӧны найӧ тӧдса местаяскӧд, войвывса шоръяскӧд, кӧні быдтісны найӧ ас кодьныс жӧ кузь кока турипиянӧс, и мыйлакӧ сьӧлӧмыд вӧрзьылӧ.

Турияс лэбзьӧны выліті. Вӧсньыдик голяяссӧ нюжӧдӧмаӧсь водзӧ. Кымын лун да вежон налы ковмас шенасьны бордъяснас, венласьны вына тӧвъяскӧд, терпитны зэрсӧ и кӧдзыдсӧ, медым воӧдчыны места вылӧ. Кымын кар да сикт вомӧн лэбзясны найӧ, уна сикас вӧръяс, юяс, степьяс аддзыласны турияс кузь туй вуджигӧн. Кутшӧм унаысь ковмылас шойччыны, коллявны сьӧдпемыд арся войяссӧ.

Турияс то нораа горӧдласны, то мыйкӧ дыра чӧв оласны. Гашкӧ, налы абу окота эновтны тӧдса местаяссӧ, войвывса мича вӧр-васӧ, паськыд ылыс нюръяссӧ, кытчӧ найӧ волывлісны эз нин ӧти во. Бать-мамыскӧд первойысь таво лэбзьӧны и налӧн пияныс, кодъяс чужисны тані. Ставыс налы тӧдтӧм, гӧгӧрвотӧм, но гырысь турияскӧд лэбзьыны абу шуштӧм, картатӧг ни компастӧг найӧ вайӧдасны том быдтасъясӧс, кытчӧ колӧ.

— Кур-лы, курлы! — пыр ылыстчӧ и ылыстчӧ лэбысьяслӧн гӧлӧсныс. А найӧс колльӧдысьяс пыр на сулалӧны места вылас да синъяссӧ оз вештывны турияс вылысь. Кор дзикӧдз нин вошӧны лунвылӧ лэбысьяс, шогпырысь ышловзян и вӧлисти мӧдӧдчан водзӧ.

Гашкӧ, турияс асланыс руд гӧн-пук костын, гӧрдоват синъяс дорас нуӧны войвылысь мичлунсӧ, нюръяслысь да видзьяслысь кӧрсӧ, медым на йылысь не вунӧдны тулысӧдз ылі муясын олігӧн.

Турияс! Турияс! Эг ӧд ми тіянӧс некор ӧтдортлӧй. Весиг медся лёк сьӧлӧма мортлӧн оз кыпты тэ вылӧ пищальыс.

Сідзкӧ, тулыснас бара кутам виччысьны тіянӧс, тури котыр. Тӧдам, воанныд ті бӧр. Быд во на тадзи вӧлі.