* * *

Кор на ичӧтик ме вӧлі,
Эг куж нинӧм вӧчны,
Пидзӧс вылас корӧсявліс
Менӧ муса пӧчным.

Мед пӧ дзоньвидзаӧн быдми,
Лои бать кодь ёнӧн...
Ог ме помнит ассьым батьӧс —
Усис зэв на томӧн.

Сэсся вӧлі юрӧс мыськас
Нильӧг кунва сорӧн.
Сылысь писӧ — менсьым батьӧс —
Шулісны Ёгорӧн.

Сэксянь Эжва юным васӧ
Нуис уна-уна.
Пӧчӧн корӧсялан здукъяс
Кувтӧдзым оз вунны.

Коми муын, чужан муын,
Тали уна ордым.
Юлі винатӧ и тшайтӧ
Уна бур йӧз ордын.

Мусмылісны уна нывъяс
(Вожа гач ӧд новла!)
Мусаяслӧн небыд сывъяс
Вӧтӧн век на вола.

Ог нин енэжланьыс быдмы,
Муланьыс нин быдма.
Анюловыд олӧмаыс
Талун меным ныма.

Чери кыя Важ Эжваысь,
Коді паськыд ота.
Кывбурӧ ме строкаяссӧ
Гажа ягысь вота.

Кыйсьыліс да вотчыліс сэн
Коркӧ менам батьӧ.
Лышкыдлунсьыд, Джеджим парма,
Сьӧлӧмсянь пӧсь аттьӧ.

Ӧшинювса льӧм пу вылын
Пышкай тивзӧ-мойдчӧ.
Кор ме мудза, чужан муӧй,
Пидзӧс вылад шойччӧд.