КӦН ТЭ ТАЛУН?


Бергалігтыр лэбӧ арся кор,
Быттьӧ лэбӧ зарни бордъя бобув...
Кӧн тэ талун муса, дона морт —
Лӧсьыд нюма, томиник ныв-бобӧ?

Лэбӧ олӧм — вояс бӧрся во...
Вай жӧ шыась, мичаӧй дай шаньӧй.
Кӧн тэ талун, лӧз синма любов —
Кузь кӧсаа, вӧсни коска аньӧй?

Тэтӧг меным гажтӧм Эжва дор,
Кытчӧ лӧня унмовсьӧма войыс.
Со и кывза чӧвлуныслысь гор,
Личӧдны мед сьӧлӧм вылысь дойӧс.

Тэтӧг шогсьӧ менам сьыланкыв,
Тэкӧд дась ме вуджны ва пыр, би пыр.
Кӧн тэ талун гӧрд платтьӧа ныв —
Менам томлун, менӧ шонтысь бипур?