* * *

Коми художник-земляк Н. Л. Жилинлы,
сы уджъяслӧн персональнӧй выставка вылын

Кӧн катласисны кыдзьяс, шувгис лыдтӧм коз,
Сэн тэкӧд коркӧ быдмим — пемыд-пемыд вӧрын.
Кӧть югыд би эз югдӧд миянсьыным поз,
Ми югыд мӧвпъяс тэкӧд новлӧдлім ас сьӧрын.

Тиманскӧй изсянь локтысь Емвалӧн сӧдз ва
Вуж налысь вынсьӧдіс и быдтіс мича быдтас.
Ме дзорга уджъяс вылад, сэні Емвалӧн душа,
И сылӧн мичлуныс став нэмъяс вомӧн ӧдтас.

Сэк видзӧдлыны локтас тэнад уна внук
И быдӧн шуас аслыс: «Шуда тайӧ здук, — 
Ми аддзам предокӧс — зэв видзлӧма бур сьӧлӧм!

Мир сійӧ лэптӧма, гармониялысь рӧм,
Морт сьӧлӧмъяслысь вын, том кадлысь югыд звӧн,
А лёксӧ пӧдтылӧма, мед оз буав тӧлӧн!»