* * *

Чужан грездса, джеджимса,
медмича нывлы...

Гожӧм, гожӧм... Муса гожӧм!
Вотӧс-тшакла кыскӧ вӧрыс.
Кывтыдпомын, су йӧр сайын,
Гӧрдӧн сотчӧ озъя нӧрыс.

Кельыд тӧлысь верзьӧма моз
Ӧшкамӧшка вывті рӧдтӧ.
Шурыд нывка кисьмӧм озсӧ
Сюмӧд чуманӧ со ӧктӧ.

Копыртчылас, веськӧдчылас,
Вомгорулас мургӧ-сьылӧ.
Видзӧдлас кӧ менам синмӧ,
Сьӧлӧмӧй сэк сись моз сылӧ.

Зі кодь вӧсни, орӧм коска,
Чужӧм вылас кокни нюма.
Рытгорувнас колльӧдчигӧн
Лоас вом дорыс ок юмов.

Быттьӧ мусьыс мездмӧм дзоридз,
Сиктлань сэсся нылыд муніс...
Жаль вот, сюмӧд чуманас сэк
Менсьым сьӧлӧмӧс тшӧтш нуис.