ГОРТЫД БЫДӦНЛЫ МУСА
Найӧ олісны кыкӧн: Ульяна пӧч да небыдик гӧна да вижоват синъяса Дорофей кань. Рытъяснас, кор Ульяна пӧч кайлывліс паччӧр вылас, медым куйлыштны сэні да шонтыштны ревматизмӧн висян лыяссӧ, сы дорӧ кыпӧдчыліс и кузь уска, сьӧд бӧжа Дорофей. Кань нюжӧдчыліс кӧзяйка бокас да пыр жӧ заводитліс кургыны-мойдны, гажӧдны Ульяна пӧчӧс.
Гожся лунъясӧ, кор ярмӧм шонді кыпӧдчыліс небеса шӧрӧ, Ульянаӧс да Дорофейӧс тшӧкыда позис аддзывлыны кильчӧ вывсьыс, кытчӧ эз веськавны шонді югӧръяс, и сэні, ыркыдінас, вӧлі сэтшӧм лӧсьыд. Кань пукаліс кӧзяйка пидзӧс вылын да куньтыраліс синъяссӧ.
Корсюрӧ Дорофей дзебсьывліс град йӧрас, гашкӧ, быдса час куйліс картупель коръяс пытшкын, сука быдмысь ӧмидз кустъяс сайын, думнас кӧсйис кутны посньыдик лэбачьясӧс, кодъяс водз асывсянь сёр рытӧдз лэбалісны да сьылісны керка дорын, кыдз пу вылын. Куйлас, куйлас, а тӧлк ни слӧй. Сідзи и некодӧс кутны оз вермы. Кылас кӧзяйкаыслысь гӧлӧссӧ, некымынысь ӧвтыштас сьӧд бӧжнас и котӧрӧн пырас керкаас.
— Дорофей, кузь ус, кӧн нӧ тэ уялан? Оз ӧмӧй кынӧмыд сюмав? И меным тэтӧг гажтӧм. Со юышт кӧть йӧвсӧ, горшыд ӧд косьмис, — морткӧд моз сёрнитӧ пӧчӧ аслас радейтана каньыскӧд.
Дорофей пыр жӧ мунас пач дорӧ, кӧні виччысьӧ нин сійӧс йӧв тыра доз. Мыйкӧ дыра лакыштас чӧскыд йӧвсӧ, гӧрд кывнас дыр нюлас волі дорсӧ, сэсся нюжӧдчас-водас небыд улӧс вылӧ.
И Ульяна пӧчлы немторйысь шогсьынысӧ: вермӧ на горт гӧгӧрсӧ бергӧдны. Майбыр, пенсия быд тӧлысь гортӧдзыс вайӧны. Сӧмын кань мозыс жӧ кургы да ов.
Но лёкыд тай, он и тӧдлы, коклябӧрад тальччас. Мый он виччысь, сійӧ и вермас лоны. Вӧлі ноябрь. Ывлаын пыр тшӧкыдджыка трачкӧдчис кӧдзыд. Он и тӧдлы, кузь тӧв пуксяс. Татшӧм ӧти лунӧ буретш и лои пакӧстьыд. Войнас, кор Ульяна пӧч да Дорофей кань чӧскыда узисны шоныд паччӧрын, виччысьтӧг пыді комнатасянь пуркнитіс тшын.
Ульяна пӧч повзьӧмысла ӧдва вермис лэччыны джоджӧдзыс. Кӧсйис петкӧдны, спаситны пӧжарысь кӧлуйсӧ, но вӧлі сёр нин. Би вильыша ыпъяліс, няръяліс-сотіс керка стенсӧ, писькӧдчис кухнялань.
Ульяна пӧч кватитіс дзӧран кияснас Дорофейӧс, мыйсюрӧ петкӧдіс аслас кӧлуй пиысь. Кӧсйис мӧдысь на пыравны, но биыс потшис сылы туйсӧ.
Недыр мысти локтісны пӧжарнӧй машинаяс. Кӧрт каскаяса пӧжарникъяс уськӧдчисны би кусӧдны. Эз коль и час джын, кыдз сійӧс вӧлі венӧма. Кань пукаліс кӧзяйка кок дорас топӧдчӧмӧн да гӧгӧрвотӧма видзӧдіс керка дорын ноксьысь йӧз вылӧ. Сэн жӧ Ульяналы кусӧдчысьяс висьталісны, мый пӧжарыс лоӧма электропровод вӧсна, кодӧс колӧ вӧлӧм вежны некымын во сайын нин.
Тадзи Ульяна пӧч да Дорофей кань дзик ӧти здукӧн воштісны ассьыныс шоныд гортсӧ, муса позсӧ, кӧні олісны эз нин этша во. Ичӧтик мича керка местаын ӧні сулаліс сьӧд гӧлӧвняясӧн вевттьысьӧм струб.
Пикӧ воӧм Ульянаӧс да Дорофейӧс суседкаыс нуӧдіс да овмӧдіс гортас. Регыд горсоветсянь Ульяналы сетісны вит судта керкаысь олан жыр. Локтіс сійӧ Дорофейкӧд выль оланінӧ. Тані вӧлі шоныд и югыд, кранъясысь пӧсь и кӧдзыд ва локтіс, газ вӧлі.
Дивъя овны. Пес ни ва оз ков пыртны. Но Ульяна пӧчлы век жӧ аслас воддза гортыс кажитчис медся мусаӧн и некыдз эз вермы сійӧс вунӧдны.
Ёна гажтӧмчис и кӧзяйка кодьыс жӧ пӧрысь Дорофей. Кань шаръяліс-шӧйтіс выль оланінын, кык лун вомас немтор эз босьтлы, пукаліс ӧдзӧс дорын да мисьтӧм гӧлӧсӧн горзіс, вӧзйысис ывлаӧ. Медбӧрын, Ульяна эз вермы терпитны каньлысь шогалӧмсӧ, лэдзис сійӧс ывлаӧ.
Лэдзис и воштіс. Дорофей ӧти лун абу, мӧд лун гӧлӧсыс оз кыв. Ульяна пӧч вель унаысь петаліс ывлаӧ, чуксаліс каньсӧ, но весьшӧрӧ.
Коймӧд луннас пӧчӧ мӧдӧдчис аслас вӧвлӧм керка дорас, кӧсйис видзӧдлыны важ оланінсӧ. Мыйӧн воис ӧшинь улас, ёкнитіс сьӧлӧмыс. Керкасьыс ӧшиньясыс жугласьӧмаӧсь, ӧдзӧсыс гурйыв восьса. Струбыс и сӧмын кольӧма да гажтӧма чурвидзысь пач трубаыс.
Эз на удит Ульяна видзӧдлыны жугалӧм ӧшиньӧд керка пытшкас, кыдзи паччӧрсьыс чеччыштіс бубуля кодь сьӧд кань да пуксис ӧшинь дорас.
— Дорофей, тэ ӧмӧй тайӧ? Ой, кутшӧма сьӧдасьӧмыд! Мыйла нӧ шоныд патерасьыд пышйин? Абу ӧмӧй жаль кӧзяйкаыд? Кынман ӧд тані и, тӧдӧмысь, тшыг. Омӧльтчӧмыд быдсӧн. Лок гортӧ мунам.
Кань кургыштіс мыйкӧ дыра, быттьӧ кӧзяйкаыслысь прӧща корис. Но кор Ульяна кӧсйис сійӧс босьтны моздорас, пыр жӧ чеччыштіс-кайис кӧдзыд паччӧрӧ.
Кыдзи эз кевмысь пӧчӧ аслас каньлы, мӧдыс эз и думайт выль местаӧ мунӧм йылысь. Мед тані гӧгӧр са да кӧдзыд, но век жӧ, тыдалӧ, тайӧ Дорофейлӧн радейтана горт.
Пемдыны нин мӧдіс, а асныра кань сідзи и эз лэччы паччӧрсьыс. Ковмис Ульяналы ветлыны матыса магазинӧ, ньӧбны сэтысь мыйкӧ мында посни чери да нуны сотчӧм керкаын олысь Дорофейлы.
Та бӧрын Ульяна пӧч быд лун волывліс аслас важ керкаӧ, сьӧрсьыс вайліс Дорофейлы сёян. Думнас пыр на кӧсйис нуӧдны ассьыс уна вося тӧварышсӧ выль патераас, но кань сідзи и эз пӧкӧритчы кӧзяйкаыслы. Сёяс сыӧн вайӧм вӧлӧгасӧ, кургыштас-аттьӧалас Ульянаӧс, сэсся крукыльтас бӧжсӧ да вошӧ керка пытшкӧ. Каньыдлы и со кутшӧм муса гортыд!
