ДӦВЕЧЛӦН ВИСЬТАСЬӦММуніс тӧв ныр. Рытъядорыс ланьтіс — Видзьяс вылӧ водіс мудзӧм тӧв. Крӧватьын ме куйла мургысь канькӧд, Таметь шуштӧм важӧн нин эз вӧв. Коймӧд во нин дӧвечала ачым, Но эг юсьы, сьӧлӧмӧн эг усь. Пасьтала, час, мича дӧрӧм-гачӧс, Тшӧтшӧдышта ныр горулысь ус. Сэсся ветла тӧдса дӧва ордӧ, Нывбабасьыс бырӧма нин гаж. Катыдпомын, ю берегын, гортыс — Абу выль, и абу ёна важ. Туис тыр ме босьті чигъя чери, Морӧс зептӧ сюйи водка доз. Быттьӧ эз и вӧвлы лунся зэрыс: Шупалӧма муыс, мир туй — кос. Вӧр-ва весьтын кодзув-мӧд и югзьӧ, Вӧтасьӧ нин рытъя унма сикт. Битӧм керка... Сідзкӧ, аньыд узьӧ... Лыжалӧны, кыла, кок и ки. Ляпкыд поска кильчӧ вылас кайи, Век жӧ, сэсся, вӧчи кутш да котш. «Татшӧм сёрнас кодӧс Енмыс вайӧ?» — Кылі гӧлӧс; сьӧлӧм — ётш да ётш. Кызӧктышті. Нимӧс ассьым шуи: Конӧ Митрей Колюнь, мися, ме. Воссис ӧдзӧс... Пыр жӧ мыччи туис, Керкаӧдзыс лэдзас менӧ мед. Пырӧмӧн тшӧтш пукси пызан помас. Варовитам, кадыс кӧть и сёр. Сьӧлӧмнаным пӧсьӧсь, пыр на томӧсь: Ӧтлаын кӧ, кыкыслы ар сё! Табак тшынӧй лайкъялігтыр гартчӧ, Сэсся шуи, збоймӧдчышті кор: Вайлы, мися, пара румка татчӧ, Сьӧрысь, мися, выйим курыдтор. Пельпом вылас павъялӧ сьӧд юрси, Пачводзсяньыс шуӧ: «Вая пыр...» Кӧть и тӧда, аньыс абу юысь, Кыкнаннымлы кисьті румка тыр. Ветымыныс абуджык на сылы, Зэв на шыльыд гӧгрӧс чужӧмбан. Сыктывкарын олӧ-вылӧ нылыс, Коді гожйис челядьыскӧд тан. Шыбӧльяса, шондібан, тэ олӧм. Гортын шуштӧм. Войпука со кӧн... Кымын водзӧ, сымын бырӧ полӧм, Сымын ёнджык зэлалӧ вир сӧн. Сьӧлӧм кылӧ аньлысь сьӧлӧм шысӧ. Кутшӧм на тэ мича, кӧчамач! Сойбордйӧдыс крӧватьланьыс кыска, Вот-вот пӧрчча ассьым дӧрӧм-гач. Аньыд пыксис, вылӧ лэптіс юрсӧ, Чужӧм вывсьыс аддзи синва войт. Мый ме вӧча? Мый ме, йӧйыд, дура? Личӧді сэк нывбабалысь сой. Мыйкӧ быттьӧ пытшкам другӧн орис, Киясӧйлы вӧлясӧ эг сет. Крӧвать весьтсянь миян вылӧ дзоргис Верӧсыслӧн ыдждӧдӧм портрет. Сыркмуныштіс аньлӧн джуджыд морӧс, Восьтіс, аддза, каличсӧ гильс-гольс: «Талун ог на... кӧть и шань тэ мортыс... Табак тшынсьыд аттьӧ, Митрей Коль!»
